Twitter Meta-ny jańa Threads áleýmettik jelisi úshin sotqa bermek

ASTANA.QazAqparat - Twitter kompanııasy Facebook pen Instagram-ǵa ıelik etetin Meta kompanııasyn sotpen qorqytty. Óıtkeni jańa Threads áleýmettik jelisi Twitter-ge óte uqsaıdy, dep habarlaıdy QazAqparat VVS-ge silteme jasap.

Semafor basylymynyń habarlaýynsha, Twitter zańgeri Aleks Spıro sársenbide Meta basshysy Mark Tsýkerbergke resmı hat jiberip, Meta-ny Threads jelisin qurý kezinde «kommertsııalyq qupııalardy jáne basqa da zııatkerlik menshikti júıeli, zııandy jáne zańsyz ıemdendi» dep aıyptaǵan.

«Básekelestik - jaqsy, biraq aldaý durys emes», - dep jazdy Twitter ıesi Ilon Mask óziniń jeke paraqshasynda.

Threads jelilik qoldanbasy osy aptanyń ortasynda iske qosyldy jáne oǵan 30 mıllıonǵa jýyq adam jazylyp úlgerdi. Meta basshylyǵy áý basta-aq bul jeli Twitter-diń balamasy bolatynyn málimdegen.

Aleks Spıro óz hatynda, Meta-ny kompanııa qupııalaryna áli de qol jetkize alatyn jáne osy áleýmettik jelini kóshirýge kómektesken ondaǵan burynǵy Twitter qyzmetkerlerin jumysqa aldy dep aıyptaıdy.

Twitter zańgeri Meta -dan bul qupııalardy qoldanýdy dereý toqtatýdy talap etip, sotqa beremin dep qorqytty.

Osyǵan deıin Twitter-ge básekeles bolatyn jańa áleýmettik jelige 30 mln adam tirkelip úlgergenin jazǵan edik.