Twitter-ge jańa basshy izdestirilmek
ASTANA. QazAqparat - Twitter-diń bas dırektory Dık Kostolo otstavkaǵa ketedi, kompanııany ýaqytsha onyń negizin qalaýshylardyń biri Djek Dorsı basqaratyn boldy, dep habarlaıdy sheteldik BAQ.
Kompanııanyń málimdeýinshe, Kostolo 1 shildeden bastap óz qyzmetinen ketedi, biraq Twitter-diń dırektorlar keńesiniń quramynda qalady. Tanymal ınternet-resýrstyń turaqty basshysy bolýǵa laıyq adamdy izdestirýdi endi arnaıy komıssııa qolǵa almaq.
Twitter Inc. amerıkandyq kompanııasy 2006 jyly qurylǵan. Onyń negizgi ónimi - jurtshylyqtyń 140 sımvolǵa deıingi qysqasha habarlamalar almasýy úshin qurylǵan áleýmettik jeli. Kompanııanyń shtab páteri Kalıfornııa shtatyndaǵy San-Frantsısko qalasynda ornalasqan.
