Twitter Donald Tramptyń akkaýntyn birjolata bloktap tastady
Twitter kompanııasy osyǵan baılanysty málimdeme jasady.
«@realDonaldTrump akkaýntynda jarııalanǵan sońǵy tvıtterdi jáne onyń mazmunyn, ásirese onyń Twitter qaýymynda qalaı qabyldanyp, ári qaraı qandaı kontekste taraǵanyn egjeı-tegjeıli tekserip shyqqan soń osyndaı sheshim qabyldadyq. Biz zorlyq-zombylyqqa aparyp soǵý qaýpin eskere otyryp akkaýntty birjola óshirdik. Osy aptadaǵy sumdyq oqıǵalardan keıin biz Twitter qoldaný talaptaryn qaıtadan buzý dál osyndaı jaǵdaılarǵa ákeletinin habarlaǵan bolatynbyz. Bizdiń talaptar tańdaýly resmı tulǵalar men álemdik kóshbasshylardan tikeleı aqparat alýǵa múmkindik beredi. Alaıda biz áý bastan bul akkaýnttar bizdiń erejege baǵynýǵa tıis ekenin jáne olar Twitter-di zorlyq-zombylyq týǵyzý úshin paıdalana almaıtynyn anyqtap túsindirgen edik» delingen kompanııa habarlamasynda.
Twitter sonymen qatar Donald Tramptyń sońǵy tvıtteri men olardyń keı qoldanýshylarǵa qalaı áser etkenine jasalǵan analızdiń qorytyndysyn jarııalady. Kompanııa bul tvıtter jańadan zorlyq-zombylyq jasaýǵa sebep bolýy múmkin dep otyr.
Prezıdent kezinde Donald Tramp 26 myńnan astam tvıt jarııalaǵan. Kúnine orta eseppen 18 tvıt jazyp otyrǵan.
Twitter sheshimi jaıly Donald Tramp bylaı dedi:
«Bizdiń aýzymyzdy eshkim jaba almaıdy. Jaqyn arada onyń ornyn basatyn jańa platforma jasaýdy qarastyryp jatyrmyn».
Ol bul sózderdi óziniń resmı Twitter akkaýntynda jazdy, alaıda kompanııa ony birden óshirip tastady.
