TWESCO Mustafa Shoqaıdyń 130 jyldyǵyna oraı halyqaralyq konferentsııa ótkizdi
Búgin sanaly ǵumyryn Túrkistannyń táýelsizdigi men tutastyǵyna arnaǵan Mustafa Shoqaıdyń týǵan kúni. Alash ardaqtysy eskishe 1890 jyldyń 25 jeltoqsanynda, jańa kúntizbe boıynsha 1891 jyldyń 7 qańtarynda dúnıege kelgen. Bıyl túrki áleminiń tuǵyrly tulǵasynyń týǵanyna 130 jyl tolyp otyr.
Osyǵan oraı búgin Halyqaralyq Túrki akademııasy «Mustafa Shoqaı jáne Túrkistan ıdeıasy» atty halyqaralyq onlaın-konferentsııa uıymdastyrdy. Akademııa prezıdenti Darhan Qydyráli konferentsııaǵa qatysqan ǵalymdarǵa alǵysyn bildirdi.
«Mustafa Shoqaıdyń 130 jyldyǵy Qazaqstan Táýelsizdiginiń 30 jyldyǵyna tuspa-tus kelip otyr. Búgingi sharaǵa Ózbekstannan, Túrkııadan, Tatarstannan, AQSh-tan, Qazaqstannan belgili ǵalymdar qatysýda. Sizderge kóp rahmet!» - dedi Darhan Qydyráli.
Jıynda túrkolog ǵalym Tımýr Qojaoǵly, tarıhshy ǵalym Mámbet Qoıgeldi, tarıh ǵylymdarynyń doktory Zııabek Qabyldınov, tatardyń qoǵam qaıratkeri ári tarıhshysy Eskendir Gılıazov jáne taǵy basqa ǵalymdar sóılep, Mustafa Shoqaıdyń ómiri men túrki birligine qosqan úlesi jaıly oı bólisti.
