TWESCO majar ǵalymynyń shamandarǵa qatysty zertteýi boıynsha fotokórme ótkizdi

ASTANA. QazAqparat - Búgin Túrki akademııasy halyqaralyq uıymy Vengrııanyń Qazaqstandaǵy elshiligimen birlesip, majar etnografy, professor Mıhaı Hoppaldyń zertteýi boıynsha «Shamandar men jora-rásimder» atty fotokórme uıymdastyrdy, dep habarlaıdy QazAqparat TWESCO baspasóz qyzmetine silteme jasap.

Kórmeniń ashylý saltanatyna belgili memleket jáne qoǵam qaıratkerleri, kórnekti túrkitanýshy ǵalymdar, Qazaqstanda tirkelgen dıplomatııalyq korpýs ókilderi men jýrnalıster qatysty.

Alqaly sharany Akademııa basshysy Darhan Qydyráli quttyqtaý sózimen ashty. Ol kórmege arqaý bolǵan tanymal majar ǵalymy Mıhaı Hoppaldyń shyǵarmashylyǵy, ásirese kóshpendi halyqtar men shamandyq ilimdi zerdelegen zertteý jumystary jóninde áńgimeledi. Sonymen birge Vengrııa men Túrki akademııasy arasynda ornaǵan berik yntymaqtastyq pen ǵylymı jobalar týraly habardar etti.
 

Budan keıin sóz alǵan Túrki keńesi aqsaqaldar keńesiniń múshesi Ádil Ahmetov pen Túrkııa Respýblıkasynyń Qazaqstan Respýblıkasyndaǵy elshisi Nevzat Ýıanyk majar-túrki rýhanı baılanystary jóninde paıymdy pikirlerin bildirdi.
 

Buǵan deıin habarlaǵandaı, 2017 jyldyń qyrkúıek aıynda BUU Bas Assambleıasynyń 72-shi sessııasy sheńberinde ótken Túrki keńesine múshe memleketterdiń Syrtqy ister mınıstrleriniń beıresmı kezdesýinde Vengrııanyń Túrki akademııasyna baqylaýshy mártebesin alý týraly ótinimi biraýyzdan maquldanǵan bolatyn. D.Qydyráli osyǵan oraı Majarstannyń Qazaqstan Respýblıkasyndaǵy Elshisi Andrash Baranı myrzaǵa iltıpatyn bildirdi. Sonymen birge, saltanatty shara aıasynda A.Baranıge «Tamyrlas xalyqtar arasyndaǵy yntymaqtastyqty damytýǵa qosqan zor úlesi jáne ǵylym-bilim salasyndaǵy baılanystardy tereńdetýdegi jemisti qyzmeti úshin» qurmet gramotasyn tapsyrdy.
 

Óz kezeginde Elshi Túrki akademııasy ujymyna kóshpendi halyqtar mádenıetin zerttep, nasıhattaýdaǵy qyzmeti úshin rızashylyq bildirdi.