TWESCO Astanada «Uly dala» gýmanıtarlyq ǵylymdar forýmyn ótkizedi

ASTANA. QazAqparat - Túrki akademııasy halyqaralyq uıymy (TWESCO) 23-24 mamyr kúnderi Astana qalasynda «Uly dala» gýmanıtarlyq ǵylymdar forýmyn ótkizedi. Bul týraly akademııanyń baspasóz qyzmeti habarlady.

Qazaqstanda tuńǵysh ret ótkizilgeli otyrǵan forýmǵa álemniń 20-ǵa jýyq elinen memleket jáne qoǵam qaıratkerleri, halyqaralyq uıym basshylary, dıplomattar men áıgili ǵalym-zertteýshiler qatysady dep kútilýde.

Túrkitildes elder táýelsizdikteriniń 25 jyldyǵy qarsańynda, Túrki jazýy kúnine oraı uıymdastyrylǵan alqaly jıynnyń negizgi maqsaty: Uly dala qundylyqtarynyń adamzat órkenıeti damýyndaǵy orny men mańyzyn paıymdaý. Sonymen qatar, qazirgi zamanǵy gýmanıtarlyq ǵylymdardyń damý úrdisterin túrki álemin zertteý salasyndaǵy tájirıbeni jınaqtap, ıdeıalarmen almasý jáne irgeli baǵyttardy anyqtaý kózdelgen.

Aıta ketý kerek, 4 paneldi otyrystan turatyn halyqaralyq forým aıasynda kórnekti aqyn, qoǵam qaıratkeri Oljas Súleımenov pen tanymal túrkitanýshy ǵalymdardy TWESCO arnaıy altyn medalderimen marapattaıdy.