«Tvıtter» paıdalanýshylary AQSh prezıdentin sotqa berdi

ASTANA. QazAqparat - Sóz bostandyǵyn qorǵaýmen aınalysatyn Knight First Amendment ınstıtýtynyń ókilderi AQSh Prezıdenti Donald Trampty «Tvıtter» paıdalanýshylaryn buǵattaǵany úshin sotqa berdi, dep habarlaıdy QazAqparat Bı-bı-sı -ge silteme jasap.

Shaǵym áleýmettik jeliniń jeti paıdalanýshysynan túsken. Habarlanǵandaı, Tramp olardy óz atyna aıtylǵan syn pikirler úshin buǵattap tastaǵan. Solaısha, AQSh konstıtýtsııasynyń birinshi bóligin buzyp otyr.

Buǵattalǵan paıdalanýshylar Amerıka basshysynyń Tvıtterdegi jazbalaryn oqyp, pikir jaza almaıdy.  

Instıtýt ókilderi sottan olardyń buǵattalýyn konstıtýtsııaǵa qarsy dep tanýdy, al Trampty óz akkaýntyna qoljetimdilikti qaıta qalpyna keltirýge,  advokattardyń aqysyn tóleýge mindetteýdi talap etýde.

Donald Tramp «Tvıtterdiń» belsendi paıdalanýshysy. Ol akkaýntyn 2009 jyly ashyp, kem degende 35 myńnan astam jazba qaldyrdy. Qazirgi ýaqytta onyń akkaýntyna tirkelgender sany 33 mıllıonnan asyp jyǵyldy.