Tujyrym jasaı bilgen adam, aldyna maqsat ta qoıa biledi - Ǵ. Hamıtova
ALMATY. QazAqparat - Tujyrym jasaı bilgen adam, aldyna maqsat ta qoıa biledi. Bul týraly Almatyda ashylǵan III Halyqaralyq koýchıng aptalyǵynda Step&Grow koýchıng Akademııasynyń bas dırektory, medıator Ǵalııa Hamıtova málimdedi.
Onyń aıtýynsha, aldyńa maqsat qoıa bilý - ómirde úlken mánge ıe.
«Al qazir aqparatqa toly zamanda kóp adam ózin joǵaltyp alǵandaı sezinedi. Aldaryna naqty maqsat qoıa almaı qınalady. Koýchıng solarǵa kómektesedi. Eshqandaı aqyl-keńessiz, usynyssyz. Basqanyń pikirin aıtyp, basyn da qatyrmaıdy. Tek áńgimemen, suraq qoıýmen jáne birge izdene otyryp, naqty maqsattar belgilenedi, olardyń reti qoıylady. Bul jerde óz betińmen tujyrym jasaý, óz betińmen sheshim qabyldaý óte mańyzdy. Óıtkeni sonda ǵana ózińdi sezinesiń, ózińdi tabasyń. Men de sheshim qabyldaı biledi ekenmin-aý dep qýanasyń. Ózińe degen senim paıda bolady. Al senim paıda bolǵan adam aldyna maqsat qoıa biledi. Soǵan jetýge umtylady. Demek, onyń ómiri maǵynaly, mándi. Demek, ol bekerge ómir súrip jatqan joq» - dedi óz sózinde Ǵalııa Hamıtova.
Esterińizge sala keteıik, keshe Almatyda III Halyqaralyq koýchıng aptalyǵy bastaldy. Ol Qazaqstan men Ortalyq Azııa elderin qamtıdy. Aptalyq Almaty, Astana, Óskemen jáne Bishkek qalalarynda 12 mamyrdan 18 mamyrǵa deıin jalǵasady.
Step&Grow koýchıng Akademııasynyń bas dırektory Ǵalııa Hamıtova sonymen qatar, koýchıngtik tehnologııalardy ómirdiń túrli salalarynda qoldaný múmkindikterin jetkizdi. Koýchıng - adamnyń ishki resýrstaryn ashýǵa baǵyttalǵan ádisteme, qala berdi ilim, - dedi ol. Basqa trenıng, semınarlardan aıyrmashylyǵy munda keńester, usynystar berilmeıdi.
Koýchtyń mindeti - transformatsııalyq, ıaǵnı túrlendirmeli suraqtar qoıý arqyly adamnyń ishki kúsh-qýatyn iske qosý. Klıent barlyq tujyrymdarǵa, qorytyndylarǵa ózi keledi. Koých tek sol maqsattarǵa janamalaı baǵyttap otyrady.
«Búginde, ásirese basqarýdaǵy jáne kompanııany damytýǵa baǵyttalǵan koýchıngter úken qyzyǵýshylyq týǵyzýda. Bul qural batystyń iri korporatsııalarynda jaqsy qyrynan tanylǵan. Endi bul ádistemeni Qazaqstandyq bızneske de usynatyn ýaqyt týdy» - dedi óz sózinde «Skill Matrix» daǵdylar zerthanasynyń bas dırektory Ásel Bektursynova
Endi Almatyda, Óskemende jáne Bishkek qalalarynda koých-kásipqoılardyń sheberlik synyptary ótedi. Oqytý sharalary kásipkerlerge, ár túrli deńgeıdegi menedjerlerge jáne koýchıng tehnologııasyn óz ómirinde qoldanýǵa qyzyǵýshylyq tanytqan adamdardyń barlyǵyna arnalǵan.
"Step&Grow" koýchıng akademııasy uıymdastyryp otyrǵan bul aptalyq eń alǵash ret Almatyda 2012 jyly ótkizilgen bolatyn. Sol jyly Qazaqstan tuńǵysh ret Halyqaralyq koýchıng qoǵamdastyǵyna endi.
Halyqaralyq koýchıng aptalyǵy bir mezette álemniń túkpir-túkpirinde ótedi. Oǵan 100-den astam elden 22 myńǵa jýyq koýcher qatysady dep kútilýde. Ondaǵy maqsat - adamdarǵa koýchıngtiń paıdasyn túsindirý. Osy aptalyq ishinde ótkiziletin barlyq dárister, sheberlik synyptary jáne koých-sessııalar tegin bolady.
