Túzeý mekemesine esirtki alyp ótpek bolǵan túrme qyzmetkeri sottaldy
ShYMKENT. QazAqparat - Ońtústik Qazaqstan oblysynda túzeý mekemesine esirtki alyp ótpek bolǵan túrme qyzmetkeri sottaldy, dep habarlaıdy QazAqparat tilshisi.
Oblystyq qylmystyq ister jónindegi mamandandyrylǵan aýdanaralyq sot Shymkent qalasyndaǵy túzeý mekemesiniń qyzmetkerin 10 jylǵa bas bostandyǵynan aıyrdy.
«Sot talqylaýynda anyqtalǵandaı, túzeý mekemesiniń qyzmetkeri N. jazasyn óteýshi B-men 35 myń teńgege oǵan azyq túlik jáne esirtki zaty «marıhýanany» zańsyz mekeme ishine ótkizip berýge kelisken. Mekeme qyzmetkeri N.-ge aqsha men esirtki zattyń mýlıajyn berý barysynda QR UQK OQO boıynsha Departamentiniń jáne OQO ІІD Ózindik qaýipsizdik basqarmasynyń qyzmetkerlerimen ustalǵan» delingen sottyń habarlamasynda.
Sot aıyptalýshyny Qylmystyq kodekstiń eki baby, 24-babynyń 3-bóligi («Qylmysqa daıyndalý jáne qylmysqa oqtalý») jáne 297-babynyń 3-bóligi 4-tarmaǵymen («Esirtki, psıhotroptyq zattardy, sol tektesterdi ótkizý maqsatynda zańsyz daıyndaý, qaıta óńdeý, ıemdený, saqtaý, tasymaldaý, jóneltý ne ótkizý») kináli dep tapty. Oǵan 10 jylǵa bas bostandyǵynan aıyrý jazasyn taǵaıyndady.
