Túzeý mekemelerindegi «Rejım» operatsııasy kezinde 292,52 gramm esirtki zattary tárkilendi
ASTANA. Maýsymnyń 22-si. QazAqparat /Qanat Mámetqazyuly/ -Túzeý mekemelerine tyıym salynǵan zattardy jetkizý arnalaryn jabý maqsatynda aǵymdaǵy jylǵy maýsymnyń 14-i men 21-i aralyǵynda respýblıka aýmaǵynda qylmystyq-atqarý júıesi qyzmetkerleri «Rejım» keń aýqymdy operatsııasyn ótkizdi,
dep habarlaıdy QazAqparat.
«Shara barysynda birshama kólemdegi tyıym salynǵan zattar alyndy. Atap aıtqanda, 292,52 gramm esirtki zattary, 457 myń 620 teńge aqsha, 541,5 lıtr spırtti sýsyndar, 151 birlik uıaly baılanys quraldary, 315 birlik ótkir kesetin zattar alynǵan. Budan bólek, turǵylyqty jeri boıynsha qoǵamnan oqshaýlanbaı jazalaýǵa sottalǵan 20 myń 121 adam tekserildi. Bul rette sottalǵandardyń jazany óteý sharty men tártibiniń 64 buzýshylyǵy aıqyndaldy», - dedi Ádilet mınıstrliginde ótken brıfıng barysynda vedomstvonyń resmı ókili Erbolat Erimbet.
