Túzetý mekemelerindegi mektepter keshki mártebege ıe bolmaýy kerek -Elvıra Ázimova
ALMATY OBLYSY. QazAqparat - Almaty oblysyndaǵy túzetý kolonııasyna qarasty mektepte tehnıkanyń jetispeýshiligi máselesi anyqtaldy, dep habarlaıdy QazAqparat.
Kámeletke tolmaǵan qylmyskerlerge arnalǵan Almaty kolonııasyna jumys sapary barysynda QR-daǵy Adam quqyqtary jónindegi ýákil Elvıra Ázimova sottalǵan balalardyń bilim sapasy máselelerin kóterdi. Jalpy bilim beretin mektepte oqý protsesin jáne týystarymen baılanysta bolý múmkindigin qamtamasyz etý úshin qajetti tehnıkanyń jetispeýshiligi máselesin anyqtap, sheshýge múmkindik týdy.
LA 155/6 Almaty kolonııasy aýyr jáne asa aýyr qylmys jasaǵan 14-ten 21 jasqa deıingi kámeletke tolmaǵan qylmyskerlerge arnalǵan. Búgingi tańda kolonııada 49 sottalǵan jazasyn ótep jatyr. Olardyń eń kishisi – 15 jasta.
Jumys sapary barysynda atalǵan kolonııaǵa QAJK tóraǵasy Janat Eshmaǵambetov, QR Adam quqyqtary jónindegi ýákil Elvıra Ázimova, sondaı-aq azaptaýlar men qatygez is-áreketterge qarsy ulttyq aldyn alý tetiginiń qatysýshylary keldi.
Sapar barysynda kolonııaǵa qarasty kámeletke tolmaǵan sottalǵandarǵa arnalǵan mektepte sapaly bilim berý maqsatynda qajetti qural-jabdyqtardyń jetispeýshiligi máselesi qozǵaldy.
Belgili bolǵandaı, Almaty qalasynyń bilim basqarmasy «ınformatıka» kýrsyn bazalyq deńgeıde oqý úshin mektep oqýshylaryn oqýlyqtarmen, oqý quraldarymen jáne kompıýterlermen qamtamasyz etti. Bunyń jetkiliksiz ekeni belgili boldy – oqýshylar proektor men noýtbýkterdiń jetispeýshiligi máselesi jaıly aıtty. Ásirese karantındik shekteýler jaǵdaıynda týystarymen beıne formatta baılanysta bolý óte mańyzdy.
Nátıjesinde, Almaty qalasy Jetisý aýdanynyń ákimdigi men jeke kásipker Aınur Jumashtyń kómegimen eki aptalyq merzimde oqý ǵımarattaryna qarajat taýyp, tehnıkamen jabdyqtady. Atap aıtqanda, proektor, ınteraktıvti taqta jáne noýtbýkter satyp alyndy.
Sondaı-aq, Adam quqyqtary jónindegi ýákil Elvıra Ázimova kámeletke tolmaǵandarǵa arnalǵan mekeme janyndaǵy árbir oqýshy kez kelgen bala sııaqty orta bilimge teń qol jetkizýi tıis ekendigine nazar aýdardy.
«Bul úshin oqýshylar mektep baǵdarlamasynyń tolyq kóleminde meńgerip, sonyń ishinde bilim berýdegi ınteraktıvti tásilder bar jańalyqtardy alýy, sondaı-aq kez kelgen tehnıkany paıdalana alýy qajet. Barlyq balalardyń bilim alýyna tolyqqandy qol jetkizý kepildigi Qazaqstan Respýblıkasynyń Konstıtýtsııasynda tikeleı bekitilgen. Túzetý mekemelerindegi kámeletke tolmaǵan balalarǵa arnalǵan mektepter keshki mártebege ıe bolmaýy kerek, óıtkeni keshki mektepterde oqý júktemesiniń kóleminde belgili bir shekteýler bar. Qazirgi ýaqytta Qazaqstanda jekelegen túzeý mekemelerge qatysty keshki mektepter saqtalýda», - dep túsindirdi Elvıra Ázimova.
