Túzelý jolyna túsken adamdarǵa qatysty jazany óteýden merziminen buryn shartty túrde bosatýdy qoldaný týraly ár ótinish egjeı-tegjeıli tekserilýi qajet - Bas prokýratýra
ASTANA. Naýryzdyń 31-i. QazAqparat - Astanada Qazaqstan Respýblıkasy Bas prokýratýrasynyń kezekti alqa májilisi ótip, onda túzelý jolyna túsken adamdarǵa qatysty jazany óteýden merziminen buryn shartty túrde bosatý jáne jazanyń ótelmegen bóligin neǵurlym jeńil jaza túrimen aýystyrý zańdylyǵynyń jáı-kúıi qaraldy.
Alqa májilisiniń jumysyna Joǵarǵy Sot, Ádilet jáne Іshki ister mınıstrlikteri, Qylmystyq-atqarý júıesi men Ákimshilik polıtsııa komıtetteriniń basshylary, Astana qalasy, Almaty, Aqmola jáne Qaraǵandy oblystarynyń prokýrorlary qatysty.
Memleket basshysy bekitken Quqyqtyq saıasat tujyrymdamasynda qylmystyq atqarý júıesin odan ári izgilendirý, sottalǵandardy qoǵamǵa qaıtadan ıntegratsııalaý jáne áleýmettendirý, sondaı-aq jazalaý mekemelerindegi osyndaı adamdarǵa qatysty oqshaýlaýmen baılanysty emes qylmystyq-quqyqtyq sharalardyń qoldanylýyn keńeıtý qarastyrylǵan.
Osyǵan oraı, quzyretti organdar men vedomstvolar tarapynan jazany óteýden merziminen buryn shartty túrde bosatý jáne jazanyń ótelmegen bóligin neǵurlym jeńil jaza túrimen aýystyrýdyń tájirıbesin jetildirýge baǵyttalǵan jumystar júrgizilýde.
Alqa májilisine qatysýshylar qaralǵan máseleniń ózektiligin atap kórsetip, mundaı sharalardy qoldaný týraly árbir ótinishti sottalǵan adamnyń yntalandyrýy men jazalaýynyń bar bolýyna, ózderi jasaǵan quqyq buzýshylyqtyń zańǵa qaıshy ekenin sezinýi men túzelý dárejesi týraly málimetterdi esepke ala otyryp, muqııat tekserýdiń mańyzdylyǵyna toqtaldy. Sonymen qatar, túzeý mekemeleri ákimshiliginiń, basqa da quqyq qorǵaý qurylymdarynyń tıisti qyzmetteri men bólimsheleriniń jumysyndaǵy kemshilikterge nazar aýdaryldy.
Alqa májilisiniń barysynda Bas prokýror Q. Mámı ýákiletti memlekettik organdardan jazany oryndaýdyń derbestik qaǵıdasy negizinde túzeý-tárbıeleý yqpalynyń tıimdiligin arttyrýdy, sondaı-aq jazany óteýden merziminen buryn shartty túrde bosatýdan keıin tıisti baqylaýdy uıymdastyrýdy talap etti.
Talqylaý nátıjesinde alqa májilisiniń músheleri sottalǵandardyń konstıtýtsııalyq quqyqtaryn múltiksiz qamtamasyz etýge, osy másele boıynsha prokýrorlyq qadaǵalaý men vedomstvolyq baqylaýdy jetildirýge baǵyttalǵan sheshim qabyldady.
