Tuzdybastaýdaǵy órttiń shyǵý sebebi anyqtaldy
ALMATY. QazAqparat - «QazAqparat» HAA tilshisi Almaty oblysy Tuzdybastaý aýylyndaǵy órt bolǵan jerde bolyp, kýágerlermen tildesti.
«Jıhaz tsehynan bastalǵan órtti jel bizdiń jaqqa burdy. Meniń anamnyń úıi aǵash úı bolatyn. Qujattardyń bári úıde qalyp, janyp ketti. Anam satur-sutyr etken dybys estip, jaryq kórgendigin aıtady. Ol dalaǵa júgirip shyqqanynda jıhaz tsehynyń aýlasy tutas otqa oranǵandyǵyn kórgen. Turǵyndar órt sóndirýshilerdi shaqyrǵan. 3 úı tutas órtenip ketti, bireýin azdap órt shaldy. Ákemdi aýyr jaǵdaıda aýrýhanaǵa alyp ketti. Qan qysymy kóterilgen anam jedel járdem qyzmetinde otyr, aýrýhanaǵa barǵysy kelmeıdi», - deıdi úıi órtengen Natalıa Patronınanyń uly.
Kýágerlerdiń aıtýynsha, kórshileri Toqtaqynovtardyń úıleri tutastaı órtenip ketken. Olardyń ákeleri men analary aýyr jaǵdaıda aýrýhanaǵa jetkizilgen.
«Árıne órttiń sebebin tıisti tulǵalar anyqtaı jatar, alaıda meniń oıymsha órt uqypsyzdyqtan boldy. Bul tseh 2015 jyly ashyldy. Onyń zańsyz jumys isteıtindigin barlyq kórshiler biledi», - dedi órtke qatysty óz pikirin bildirgen Natalıa Patronınanyń uly.
Aıta keteıik, órt sóndirý kezinde órt sóndirý qyzmetkerlerine jergilikti turǵyndar kómek kórsetti. Órt saldarynan Almaty men Almaty oblysynyń shyǵys aýdandaryn baılanystyratyn Talǵar tasjoly jabyldy.
27 shilde kúni saǵat 22:10 shamasynda Almaty oblysy Talǵar aýdany Tuzdybastaý aýylyndaǵy Jibek joly kóshesinde jıhaz tsehynan shyqqan órttiń saldarynan aýlasyndaǵy ýaqytsha turaq pen baraq tárizdi salynǵan úı órtendi.
Qazirgi ýaqytta tilsiz jaý tolyqtaı aýyzdyqtaldy. Aldyn ala málimetter boıynsha órt aýmaǵy 380 sharshy metrdi qamtydy.
