«Týystas elder, sýyspas kóńilder» - BAQ-qa sholý
***
«Keshe Qazaqstan Prezıdenti Nursultan Nazarbaev Ózbekstanǵa resmı sapary aıasynda osy el Prezıdenti Islam Karımovpen kezdesti. Memleket basshylary ekonomıkalyq, ǵylymı-tehnologııalyq jáne mádenı-gýmanıtarlyq ózara is-qımyl aspektilerin talqylady. Sondaı-aq, halyqaralyq jáne óńirlik kún tártibindegi ózekti máseleler jóninde pikir almasty», - dep jazady «Egemen Qazaqstan» gazeti senbilik sanyndaǵy «Týystas elder, sýyspas kóńilder» degen taqyryptaǵy maqalasynda. Basylymnyń jazýynsha, Qazaqstan Prezıdenti bul ekijaqty kezdesý I.Karımovtiń byltyrǵy sapary aıasynda júrgizilgen Qazaqstan-Ózbekstan kelissózderiniń jalǵasy bolyp sanalatynyn atap ótti.
«Qazaqstan men Ózbekstan - óńirimizdegi beıbitshilikti, qaýipsizdikti, saýda men ál-aýqattyń artýyn qamtamasyz etetin negizgi memleketter. Biz ortaq jaýapkershilikti tereń sezine otyryp, jaǵdaıǵa kelissózder jolymen yqpal etýge umtylamyz», - dedi N.Nazarbaev. Al óz kezeginde Ózbekstan Prezıdenti elder arasyndaǵy ekijaqty qarym-qatynastar údemeli damyp kele jatqanyn atap ótti. «Álemde burynǵysynsha boljap bilmeıtin daǵdarystyq úderister baıqalyp otyrǵanyna qaramastan, bizdiń elderimiz arasyndaǵy taýar aınalymyna ósý úrdisi tán. Mysaly, 2012 jyly ol 9,6 paıyzǵa ósip, 2 mıllıard 700 mıllıon dollardy qurady. Bul dınamıka jaqsy áleýettiń bar ekenin kórsetedi jáne biz ony arttyrýǵa tıispiz», - dedi I.Karımov.
Qostanaı oblysynda densaýlyq saqtaý salasy barlyq kórsetkishter boıynsha respýblıkada on ekinshi orynnan tórtinshi orynǵa kóterildi. Aldaǵy jeksenbide ótetin dárigerlerdiń kásibı merekesi aldynda «Egemen Qazaqstan» tilshisi oblystyq densaýlyq saqtaý basqarmasynyń basshysy Oral Bekmaǵambetovke jolyǵyp, birneshe saýalyna jaýap alǵan. Basylymnyń tilshisiniń barlyq saýalyna tuşymdy jaýap bergen ol: «Byltyr kóp jyldardan beri oblysta birinshi ret ana ólimi tirkelgen joq. Biraq bul bizdiń qyzmetkerlerdiń toqmeıilsýine sebep bolmaıdy. Jyl boıy bizdiń dárigerler aýyr bosanǵan qyryqtan astam áıeldi ajal tyrnaǵynan arashalap qaldy. Bul dárigerler men akýsherlerdiń joǵary biliktiliginiń, sanıtarlyq avıatsııanyń óz mindetine asa jaýapkershilik kórsetýiniń arqasynda múmkin boldy. Osy analardyń kez kelgeni bala týý ústinde ketip qalýy múmkin edi ǵoı?» - deıdi. Suhbat «Densaýlyq saqtaý salasy: sanadaǵy silkinis» degen taqyryppen berilgen.
***
«Aıqyn» gazetiniń jazýynsha, keshe Parlamenttiń qos palatasy birlesken otyrysqa jınalyp, aldymen depýtattar Konstıtýtsııalyq Keńes tóraǵasy Igor Rogovtyń «Qazaqstandaǵy konstıtýtsııalyq zańdylyqtyń jaı-kúıi týraly» joldaýyn tyńdady. Sodan keıin qalaýlylar el Úkimetiniń jáne Esep komıtetiniń «2012 jylǵy respýblıkalyq bıýdjettiń atqarylýy týraly» esepterin qarady. Birden aıta keteıik, talqylaý qorytyndysynda Senat pen Májilis depýtattary ol esepterdi maquldady. Osylaısha Parlament Serik Ahmetov basqaratyn Úkimetke senim bildirdi. Osy otyrys arqaý bolǵan maqala basylymda «Úkimettiń esebi jan-jaqty talqylandy» degen taqyryppen berilgen. Gazet tilshisiniń jazýynsha, depýtattar áleýmettik saıasat salasynda da kóptegen syn-eskertpeler bildirgen bolatyn. S.Ahmetov áleýmettik saıasatty jetildirý baǵytynda da úlken jumys júrgizilip jatqandyǵyn habarlady. Onyń aıtýynsha, Úkimet «Áleýmettik jańǵyrtý tujyrymdamasyn» ázirleýde.
***
Búgin ońtústik astanamyz Almatyda jeńil atletıkadan dástúrli Ǵusman Qosanov memorıaly jalaýyn jelbiretpek. Eki kúnge sozylatyn dúbirli dodada kórshiles jatqan segiz elden 200-ge jýyq sportshylar qatysatyn kórinedi. Bul jaıynda «Alash aınasy» gazetiniń senbilik sanyndaǵy «Azııa chempıonatyn ótkize almaı uıatty bolyp júrmiz» degen taqyryptaǵy maqalada keńinen baıandalǵan. «Búgin tańerteńnen bastalyp, jeksenbiniń keshine deıin jalǵasatyn halyqaralyq týrnır bıyl 23-shi ret uıymdastyrylmaq. Ádettegideı memorıalǵa qatysýǵa Qyrǵyzstan, Ózbekstan, Tájikstan jáne Túrikmenstan elderi aldyn ala ótinish berip qoıǵan. Degenmen Ázirbaıjan, Iran jáne soltústik kórshilerimiz Reseı de sportshylaryn alyp keledi dep kútilýde. Aldyn ala habarlanǵan málimet boıynsha Grýzııa quramasy da jarysqa qatysýǵa nıetti bolatyn. Alaıda Qap taýyn jaǵalaǵan atletterdiń, ókinishke qaraı, sońǵy sátte qujattary durys bolmaı, jarty jolda qalyp qoıdy», - dep jazady basylym.
