Týyp-ósken jerimdi qatty saǵynyp júrmin - Erjan Maksım
NUR-SULTAN. QazAqparat - Erjan Maksım – Reseıdegi eń tanymal, aýqymdy «Golos.Detı» jobasynyń jeńimpazy, talantty qazaqstandyq jas ánshi. Atalmysh shoýdyń fınalyna jetken jas órenge myńdaǵan tyńdarman daýys berip, nátıjesinde ol asqan tanymaldylyqqa ıe boldy. Boıyndaǵy talantymen tyńdarmandy tánti etken 12 jasar Erjan bıylǵy Polshanyń Glıvıtse qalasynda ótetin «Junior Eurovision Song Contest 2019» án baıqaýynda Qazaqstannyń namysyn qorǵaıdy. Búginde ol «Balalar Eýrovıdenıesi» baıqaýyna qyzý daıyndyq ústinde. Dese de, ol bizge suhbat berýge ýaqytyn bóldi.
- Erjan, sálem! Suhbattasýǵa kelisimińdi berip, ýaqyt tapqanyńa kóp rahmet. Kezekpen bastaıyqshy. Qazir Erjan Maksım otbasymen Reseıde turady, Igor Krýtoıdyń akademııasynda bilim alyp jatyr. Solaı ma?!
- Sálemetsiz be. Sizderge de rahmet. Iá, men, ákem jáne anam úsheýmiz búginde Reseıde, Máskeý qalasynda turyp jatyrmyz. Igor Krýtoıdyń akademııasynda oqımyn.
- Akademııadaǵy bir kúnińniń kestesimen bólise otyrsań....
- Igor Krýtoıdyń mýzykalyq akademııasyna aptasyna 2 ret baramyn. Sabaǵym sársenbi, beısenbi kúnderi keshki 18.00-de bastalady. Birinshi sabaq - vokal. Odan keıin eki sabaq horeografııa bolady. Beısenbi kúni bir sabaq - vokal, eki sabaq - akterlik sheberlik.
- Sabaǵyń, Reseı eli unap jatyr ma ózińe?
- Sabaǵym, árıne, unap jatyr. Máskeý de unaıdy. Bári jaqsy, bári tamasha. Biraq óz elimdi saǵynamyn, ásirese týyp-ósken jerim - Oraldy qatty saǵynyp júrmin. Búginde ataýly úlken sharalarǵa qatysý úshin arasynda Qazaqstanǵa kelip-ketip júrmin.
- Sen qazirgi tańda dúnıe júzine tanymal reseılik «Golos. Detı» televızııalyq jobasynyń jeńimpazysyń. Bul jobanyń seniń ómirińdegi orny qandaı?
- «Golos. Detı» jobasy maǵan eń aldymen tanymaldylyq ákeldi. Meni tek Qazaqstan emes, ózge elder de tanı bastady. Reseılik, qazaqstandyq shoý-bıznestegi óner juldyzdarymen tanys boldym. «Golos. Detı» jobasy qatysýshylarynyń vatsapta chaty bar. Sol arqyly bárimen habarlasyp turamyn.
- «Junior Eurovision Song Contest 2019» halyqaralyq baıqaýyna sanaýly kúnder qaldy. Daıyndyq qalaı?
- «Eýrovıdenıe» baıqaýyna qyzý daıyndyq ústindemin. Konkýrsta oryndaıtyn ánimniń birinshi shýmaǵy men qaıyrmasy aǵylshyn tilinde bolǵandyqtan, aǵylshyn tiliniń kýrsyna baryp júrmin.
- «Junior Eurovision Song Contest 2019» baıqaýynyń bıylǵy qatysýshylaryn, ıaǵnı ózińniń qarsylastaryńdy tanısyń ba, kórdiń be? Olardyń ónerin qalaı baǵalaısyń?
- Qatysýshy balalardy ınternet jelisinen ǵana qarap, syrttaı tanyp júrmin. Árıne, qarsylastarym ońaı emes. Bári talantty. Barlyǵynyń oryndaıtyn áni ádemi.
- Baıqaýdan ne kútesiń?
- Árıne, barlyǵy jeńisten úmittenedi ǵoı. Tym bolmasa, úzdik úshtiktiń qatarynan kórinsem, sonyń ózi - men úshin úlken jeńis. Bul jarysqa elimniń atynan bara jatqandyqtan, úlken abyroımen ánimdi oryndap shyqsam, jeńis tuǵyrynan kórinsem degen armanym men maqsatym bar.
P.S. Qazaqstan 2019 jyldyń 24 qarashasynda Polshanyń Glıvıtse qalasynda ótetin halyqaralyq «Junior Eurovision Song Contest» án baıqaýyna ekinshi ret qatysady. 9-14 jas aralyǵyndaǵy oryndaýshylar qatysatyn «Eurovision» analogynda elimizdi Erjan Maksım tanystyrady. Qazaqstannyń aýmaǵynda baıqaýdy «Habar» telearnasy translıatsııalaıdy. «Habar» agenttigi 2016 jylǵy 1 qańtardan bastap is-sharany uıymdastyratyn Eýropalyq habar taratý odaǵynyń (EBU) qaýymdasqan múshesi sanalady, bul múshelik atalǵan baıqaýǵa qatysý úshin elden úmitker usynýǵa múmkindik berdi.
