«Páktik tizimindegi» stýdent qyzdardyń ata-anasy Qazaq ulttyq ýnıversıtetin jaýapqa tartpaq
ASTANA. KAZINFORM – Daýy órship turǵan «Páktik tizimindegi» stýdent qyzdardyń ata-analary Qazaq ulttyq ýnıversıtetin jaýapqa tartpaq. Bul týraly DALA INSIDE saıty jazdy.
Advokattarǵa alǵashqy suraý tústi deıdi, DALA INSIDE derekkózi. Qazir árkimnen sheke shaǵym emes, birikken aryz máselesi sheshilip jatyr.
«Advokattar birikken aryzdyń tıimdi bolatynyn aıtqan. Aryzdanýshylar moraldi kompensatsııa kólemi týraly ortaq sheshimge kelýi tıis. Odan keıin aryz sotqa jiberiletin bolady» — delingen habarlamada.
Dál osy kezde Joǵarǵy bilim mınıstrligi de QazUÝ rektoryn aýystyrý máselesin oılastyra bastady. 2019 jyldan beri ulttyq statýsy bar ýnıversıtet rektorlaryn Prezıdent emes, mınıstrlik ashyq konkýrs arqyly saılaı alady. Sondyqtan rektor Janseıit Túımebaev máselesi mınıstr Saıasat Nurbektiń qolynda bolyp tur.
Rektor týraly suraq kún tártibine beker qoıylyp otyrǵan joq. Ál-Farabı atyndaǵy Qazaq ulttyq ýnıversıteti sońǵy eki jylda túrli janjaldardan kóz ashpaı keledi. Biraz janjaldy rektor Túımebaevtiń ózi týǵyzdy.
«Mysaly, 2023 jyldyń kúzinde QazUÝ «Eski Qazaqstandaǵy» ádetine basyp, Jýrnalıstıka fakýltetiniń bos aýdıtorııasyna Kemel Toqaevtyń atyn bergizedi. Ol ýnıversıtettiń óz bastamasy bolǵan. Alaıda, sharaǵa kelgen táýelsiz BAQ — «Azattyq radıosy» aldynda rektor Túımebaev ustamsyzdyq tanytyp, ol áreketi ıýtýbta keń taralady. Artynan jýrnalıstıka fakýltetiniń dekanaty «Azattyq radıosyna» pikir bergeni úshin dáris oqyp júrgen jas muǵalim Dastan Qastaıdy qýdalaı bastaıdy. Naqtyraq aıtsaq, dekanattaǵy hatshy qyz Dastan Qastaıǵa papkadaǵy delosyn ákelip berip, «siz ótpeı qaldyńyz, endi sabaqqa kelmeńiz» degen. Alaıda Dastan Qastaıdyń osy máselege qatysty feısbýktaǵy jazbasy úlken rezonans týdyryp, iske Joǵarǵy bilim mınıstri Saıasat Nurbek aralasty. Odan keıin jýrnalıstıka fakýltetindegi dekannyń mindetin atqarýshy jumystan ketti» - dep jazylǵan atalǵan derekkózde.
QazUÝ qazirgi kúıinde eski avtorıtarly-konservatorlyq, bıýrokratııalyq mehanızmniń jıyntyq obrazyna uqsaıdy.
«Ýnıversıtettiń ishki bıznes-protsesteri aýyr jáne kúrdeli bolǵandyqtan, oqý ornyna serpindi damý óte qıyn. Jańa rektor jańa energııa alyp kele ala ma? Ony tek ýaqyt kórsetedi» - delingen aqparatta.
