Túımebaev jarty ǵasyrdan astam tarıhy bar mekteptiń jumysymen tanysty
ShYMKENT. QazAqparat - Búgin Ońtústik Qazaqstan oblysynyń ákimi Janseıit Túımebaev jarty ǵasyrdan astam tarıhy bar, úsh tilde oqytatyn mamandandyrylǵan Shymkent qalasyndaǵy №12 mektep-ınternatynda boldy, dep habarlaıdy oblys ákiminiń baspasóz qyzmeti.
Onda ákim keńes dáýiriniń Sotsıalıstik eńbek eri, mekteptiń alǵashqy dırektory Marjan Tasovanyń eskertkishine gúl shoqtaryn qoıyp, bilim ordasynyń murajaıymen, balalardyń jasaǵan qolóner buıymdaryn jáne kitaphana jumysymen tanysty.
Sonymen qatar, aımaq basshysy ardager ustazdarmen kezdesip, olardy tól merekelerimen quttyqtady.
«Búgingi merekelik kezdesýge osy bilim uıymynda balalarǵa bilim men tárbıe berýde joǵary kórsetkishterge ıe bolyp, zeınetke shyqqan ardager ustazdarymyz qatysýda. Sizder bilim nárimen sýsyndatqan, osy mektepten túlep ushqan qanshama jastar búginde Qazaqstannyń túkpir-túkpirinde jemisti eńbek etip, elimizdiń órkendeýine óz úlesterin qosýda. Osy mektep qabyrǵasynda myńdaǵan shákirtterge tálim bergen, ardager ustazdarymyzdyń eńbek joly - árdaıym shákirtter úshin óshpes ónege. Bilim uıymynyń árbir jetistigi - ustazdar ujymy men oqýshylardyń birlese atqarǵan qajyrly eńbeginiń jemisi», - dedi ákim.
1961 jyly ashylǵan mektepte akademık Tynysbek Qalmenov, Amanbek Aqaev, Ábý Meńlibaev syndy belgili bilim jáne ǵylym maıtalmandary bilim alǵan.
Osy mektep qabyrǵasynda myńdaǵan shákirtterden bólek, oblys ákimi J.Túımebaevta bilim alǵan. Búgin ákim matematıka páninen sabaq bergen, ári synyp jetekshisi Sara Qabylbekova men tárbıeshi apaıy Nurjamal Qalaýovaǵa jáne hımııa pániniń muǵalimi Múkenova Saılaýkúl men geografııa pániniń muǵalimi Janseıitova Darıǵa apaılaryn merekemen quttyqtap, syı-sııapat tartý etti.
Búgingi tańda mektep qabyrǵasynda 485 oqýshy bilim alýda. Onyń ishinde úzdik oqýshylar sany - 122, halyqaralyq, respýblıkalyq, oblystyq olımpıadalar men ǵylymı jobalardyń jeńimpazdary - 41. Olarǵa joǵary sanatty bilikti 56 ustaz jáne 33 tárbıeshi bilim berýde.
Bıylǵy osy mekteptiń bitirýshi túlekteri Ulttyq biryńǵaı testtiń qorytyndysymen ortasha 100 ball jınasa, al mekteptiń túlegi Pernequlova Aına 137 ball jınap, Respýblıkada aldyńǵy shepke shyǵyp ustazdaryn qýantty.
Sýretterdi Samat Myrzalıev túsirgen
