Túımebaev týberkýlezdiń jappaı taralýyna jol bergen basqarma basshysyna qatań sógis jarııalady
ShYMKENT. QazAqparat - Ońtústik Qazaqstan oblysynyń ákimi Janseıit Túımebaev Túrkistanda týberkýlezdi jappaı juqtyrý oqıǵasyna qatysty basqarma basshysyna qatań sógis jarııalaýdy tapsyrdy.
Bul týraly aımaq basshysy aýdan, qala ákimderimen jáne oblystyq basqarmalar basshylarynyń qatysýymen ótken selektorlyq májiliste málimdedi, dep habarlaıdy QazAqparat HAA tilshisi.
Jıynda oblys basshysy Túrkistandaǵy arnaıy áleýmettik qyzmet kórsetý ortalyǵyndaǵy oqıǵaǵa baılanysty tıisti sala basshylarynyń atqaryp jatqan jumystaryn da tyńdady.
«Bul jaǵdaı áleýmettik mekemede oryn aldy. Sondyqtan Jumyspen qamtýdy úılestirý jáne áleýmettik baǵdarlamalar basqarmasynyń basshysy Ásııa Temirbaevaǵa qatań sógis jarııalansyn. Tekserý nátıjesiniń qorytyndysyna oraı taǵy da shara qoldanatyn bolamyz», -dedi Janseıit Túımebaev.
Juqpaly aýrýdan úsh naýqastyń kóz jumýy óte qaıǵyly oqıǵa ekendigine toqtalǵan óńir basshysy, kemshilikterge jol bergen qyzmetkerlerge qatysty tekserý taǵaıyndalǵanyn jetkizdi. Quqyq qorǵaý organdary da oqıǵaǵa oraı tergep-tekserý jumystaryn bastaǵan. Ázirge bul jaǵdaıǵa baılanysty atalǵan mekeme basshylyǵy jumystan bosatyldy.
Eske salaıyq, Túrkistandaǵy psıhonevrologııalyq dıspanserden ókpe qurt aýyryna shaldyqqandar sany 65 adamǵa jetti. Naýqastardyń 24-i derttiń ashyq túrimen aýyratyny anyqtalǵan edi. Úsh naýqas syrqatynan aıyqpaı, qaıtys boldy.
