Túımebaev TIKA-nyń Qazaqstandaǵy ókilimen kezdesti

ShYMKENT. QazAqparat - Ońtústik Qazaqstan oblysynyń ákimi Janseıit Túımebaev Túrkııa Respýblıkasy Úkimeti janyndaǵy Túrik yntymaqtastyq jáne úılestirý agenttiginiń (odan ári - TIKA) Qazaqstandaǵy ókili Álı Ihsan Chaglarmen kezdesti, dep habarlaıdy oblys ákimdiginiń baspasóz qyzmeti.

Basqosýda taraptar baýyrlas qazaq-túrik qarym-qatynasyn odan ári jaqsartý jaıyn talqylap, yntymaqtastyq memorandýmyn túzý jaıyn áńgimeledi. Atap aıtqanda, olar aýyl sharýashylyǵy, ónerkásip, mádenıet, týrızm syndy túrli salalar boıynsha birlesken jobalar jasaýǵa ýaǵdalasty.

Óz kezeginde, aımaq basshysy oblysqa arnaıy kelgen mártebeli meımanǵa alǵysyn bildirip, birlese jumys isteýge daıyn ekenin jetkizdi.

Agenttik ókili Álı Ihsan Chaglar ózi qyzmet etetin TIKA uıymy arqyly Qazaqstannyń Táýelsizdik jyldarynda jetken tabystaryn dúnıejúzine tanytyp, elimizdiń atyn shyǵarýǵa áreket etetinin jetkizdi.

Aıta ketý kerek, Túrkııa Respýblıkasy Úkimeti janyndaǵy Túrik yntymaqtastyq jáne úılestirý agenttiginiń álemniń 56 elinde fılıaldary bar. Jer-jahannyń 150 elimen yntymaqtastyq jobalaryn jasasqan TIKA uıymy sońǵy 3 jylda yntymaqtastyq jumystary men gýmanıtarlyq kómekterdiń arqasynda álemde aldńǵy qatarǵa shyqqan.