Túımebaev: Tatýlyqty tý etken beıbit halqymyzdyń 25 jylda baǵyndyrǵan belesteri orasan

ASTANA. QazAqparat - Ońtústik Qazaqstan oblysynyń ákimi Janseıit Túımebaev barsha Qazaqstan halqyn Táýelsizdik kúni merekesimen quttyqtaıdy. «QazAqparat» HAA oqyrman nazaryna quttyqtaý mátinin usynady.

***

  

Qymbatty otandastar!

Qurmetti ońtústikqazaqstandyqtar!

Sizderdi barsha armanymyzdyń asqary, baqytymyzdyń bastaýy bolǵan ulyq merekemiz - Táýelsizdiktiń 25 jyldyǵymen shyn júrekten quttyqtaımyn!

Shırek ǵasyr buryn Elbasymyz Nursultan Ábishuly Nazarbaevtyń salıqaly saıasatymen dúıim dúnıege Táýelsizdigimizdi jarııa etip, Máńgilik el bolýdyń biregeı qadamyn jasadyq. Ata-babalarymyzdyń armany aqıqatqa aınalyp, azattyqqa qolymyz jetti. Tarıhı oqıǵalar toǵysqan 16 jeltoqsan  biz úshin qasıetti kún sanaldy!

Tuǵyry - tynyshtyq, tiregi - turaqtylyq, tilegi - tatýlyqqa negizdelgen Qazaq elin búginde álem beıbitshilik besigi dep moıyndaıdy. Yntymaqty uran, tatýlyqty tý etken beıbit halqymyzdyń 25 jylda baǵyndyrǵan belesteri orasan. Osy ýaqyt aralyǵynda álemniń damyǵan 30 eliniń qataryna umtylǵan memleketimizdiń tolaǵaı tabystary orasan. Munda 3 mıllıonǵa jaqyn jerlesimiz ómir súrip jatqan Ońtústik Qazaqstan oblysynyń alar orny aıryqsha.

Táýelsizdik jyldaryndaǵy jetistikterimizdi tizbelesek, aıtyp taýysa almasymyz anyq. Sonyń ishindegi bir ǵana aýyl sharýashylyǵy salasyndaǵy jalpy ónim 43 esege artyp, 456 mlrd.teńgeni qurady. Sońǵy bes jylda zamanaýı tehnologııalardy qoldanysqa keńinen engizýde aldyńǵy qatardaǵy oblysymyzda tamshylatyp sýǵarý ádisin qoldaný - 24,2, jylyjaı keshenderiniń kólemi - 9, jemis-jıdek saqtaý qoımalary - 6,5 jáne tereń qopsytý ádisin qoldaný 41 esege artty. Al, mal sharýashylyǵy buryn sońdy bolmaǵan etti jáne sútti baǵyttaǵy iri qara mal jańa tuqymdarymen tolyqtyrylýda.

Óńirimizdegi ónerkásip salasy qarqyndy damyp, shırek ǵasyrda óndirilgen ónimder kólemi 650 mlrd. teńgege jýyqtady. Indýstrııalandyrý baǵdarlamasy aıasynda 150-den astam joba iske qosylyp, jalpy sany 12 myńnan asatyn turaqty jumys oryndary quryldy.

Táýelsizdik kúni - bar ǵumyryn bostandyq úshin kúreske arnaǵan bozdaqtardyń jankeshti eńbegi men eren erligin eske alatyn qasterli mereke. Ult Kóshbasshysy atap kórsetkendeı, Táýelsizdik - táýekeli jetkenderdiń ǵana peshenesine buıyratyn baqyt! Bul keshegi babalar erliginiń rýhyn alǵan, erteńgi urpaǵyna jol salǵan zamandastarymyz - sizderdiń eseli eńbekterińizdiń jemisi.

Qadirli jerlester!

Barshańyzǵa zor densaýlyq, shańyraqtaryńyz shattyq, berekeli birlik pen baıandy tirlik tileımin!

Táýelsizdigimiz tuǵyrly, eldigimiz ǵumyrly, Máńgilik Elimizdiń kelbeti sándi, etken eńbegimiz mándi bolsyn!

  

Qurmetpen,

OQO ákimi J.Túımebaev