Túımebaev Shymkenttiń jylý berý júıeleriniń jumysymen tanysty
ASTANA. QazAqparat - Ońtústik Qazaqstan oblysynyń ákimi Janseıit Túımebaev Shymkenttegi jylý berý qazandyqtarynyń jumys isteý júıesimen tanysty, dep habarlaıdy QazAqparat oblys ákimi apparatynyń baspasóz qyzmetine silteme jasap.
Kún raıynyń kúrt sýytýy oblystyń shuǵyl arada jylý maýsymyna daıyndyǵyn shıratty. Osy oraıda aımaq basshysy basshysy birqatar sala jetekshilerimen kezdesip, Shymkenttegi jylý berý qazandyqtarynyń jumys isteý júıesimen tanysty. Aldymen aımaq basshysy ákimshilik iskerlik ortalyǵynda ornalasqan qýattylyǵy 160 Gkal bolatyn qazandyqty kórdi. Qazirgi kezde, atalǵan jylý berý ortalyǵy arqyly 24 kópqabatty turǵyn úı men 6 bıýdjettik mekeme qazannyń 17-sinen bastap, ortalyqtandyrylǵan jylýmen qamtamasyz etilýde. Ótken jyly iske qosylǵan bul qazandyqtyń búginde óz qýattylyǵymen jumys istemeı otyrǵanyn alǵa tartqan qala basshylyǵy oblys ákiminen osy mańdaǵy kópqabatty úılerge qosymsha jylý qubyrlaryn tartý úshin bıýdjetten qarjy qarastyrýdy surady.Óz kezeginde oblys ákimi qalanyń jylý berý júıesin tıimdi etetin arnaıy syzba ázirleýdi tapsyryp, jańa qazandyq salý boıynsha usynysty keler jyldyń bıýdjeti arqyly sheshýdi júktedi.
Sonymen qatar, aımaq basshysy «Nurly jol» baǵdarlamasy aıasynda qolǵa alynǵan magıstraldy jylý júıesiniń qaıta qurý jumysymen tanysty. Uzyndyǵy 6,5 shaqyrym bolatyn qubyrdyń ázirge 6 shaqyrymynda jumys bitken. Qalǵanyn jýyq arada shuǵyl bitirýdi tapsyrdy. Budan soń, oblys ákimi bastaǵan jumysshy top «3-Energoortalyq» AQ-da bolyp, ondaǵy jumys barysyn da qadaǵalady. Jylý júıesiniń daıyndyq barysyn pysyqtaǵan oblys ákimi sapar barysynyń qorytyndysy boıynsha birqatar sala basshylaryna naqty tapsyrmalar berip, turǵyndardy qazannyń sońyna deıin jylýmen qamtamasyz etýdi mindettedi.
