Túımebaev sharýalarǵa memlekettik sýbsıdııalar jóninde aıtyp berdi
ASTANA. QazAqparat - Bıyl Ońtústik Qazaqstan oblysynda 59 gektar jańǵaq pen 7 gektar badamsha egildi. Sondaı-aq tamshylatyp sýarý ádisi 7,5 myń gektarǵa endirilip, jalpy kólemi 58,5 myń gektarǵa jetip otyr. Budan bólek, jylyjaılar kólemi 1294 gektarǵa artyp, respýblıkadaǵy úlesi 80 paıyzdy qurady. Búgin bul týraly «AGRITek Shymkent-2017» halyqaralyq kórmesi aıasynda ótken semınar-keńeste Ońtústik Qazaqstan oblysynyń ákimi Janseıit Túımebaev málim etti.
Jıynǵa sheteldik jáne otandyq kompanııa ókilderi, aýyl sharýashylyǵy salasynyń qyzmetkerleri, qarjy uıymdarynyń mamandary, kásipkerler men sharýarlar, barlyǵy 500-ge jýyq adam qatysty.
Sharanyń negizgi maqsaty - memleketter arasynda agrosalada tájirıbe almasý jáne jańa tehnologııalardy, birlesken bıznes-jobalardy qurý boıynsha iskerlik qarym-qatynasty nyǵaıtý.
Semınar keńeste sóz alǵan oblys ákimi J.Túımebaev halyqaralyq kórmeniń joǵary deńgeıde uıymdastyrylǵanyn aıtyp, óńirdiń aýyl sharýashylyǵy salasyndaǵy jetistikteri men aldaǵy josparlar jaıynda baıandady.
«Aýyl sharýashylyǵy salasyna zamanaýı tehnologııalardy engizbeı jetistikke jetý óte qıyn. Osy oraıda memleket tarapynan jańadan alynatyn aýyl sharýashylyǵy tehınıkalary men jabdyqtarǵa 25 paıyzdan 50 paıyzǵa deıin ınvestıtsııalyq sýbsıdıalar berile bastady. Budan bólek, ónimdi joǵarylatýǵa múmkindik beretin joǵary surypty tuqym men tyńaıtqyshtarǵa arnaıy sýbsıdııalar qaralyp otyr. Oǵan qosa, kóktemgi dala jumystaryna - 2 paıyz, al ózge baǵyttarǵa 6-8 paıyz jeńildetilgen nesıeler berilýde. Bul aýyl sharýashylyǵy salasynyń ónimdiligin arttyrýǵa, ıaǵnı sharýanyń mol jáne sapaly ónim alýyna baǵyttalǵan memlekettik qoldaý bolyp tabylady», - dedi Janseıit Qanseıituly.
Jıyn barysynda agrotehnıkanyń ozyq úlgilerin qurastyratyn kompanııalarmen baılanys ornatyp, aýyl sharýashylyǵyna qajetti qural-jabdyqtardy ózimizde óndirýdiń múmkindikteri men joldary talqylandy. Sharýalar men kásipkerlerdiń saýaldary men usynystary tyńdalyp, semınar pikir-almasý alańyna aınaldy. Árbir pikirdi muqııat tyńdaǵan oblys ákimi aýyl shaýrashylyǵy salasynyń mamandary men aýdan-qala ákimderine kórmede usynylǵan aýyl sharýashylyǵy tehnıkalarynyń sharýalarǵa qoljetimdi bolýyn jáne agrosalaǵa jańa tehnologııalardyń kóptep engizilýin tapsyrdy.
Shymkent qalasyndaǵy «Kórme» ortalyǵynda ótken dástúrli «Agritek Shymkent - 2017» kórmesine bes memlekettiń 50-den astam kompanııasy aýyl sharýashylyǵy salasyna qajetti ozyq tehnologııalar men qural-jabdyqtardy usyndy. Úsh kúnge jalǵasqan kórmeni 1500-ge jýyq adam tamashalady.
Aıta keteıik, bıyl oblysta aýyl sharýashylyǵy daqyldarynyń egis kólemi 818 myń gektarǵa jetip, ótken jylmen salystyrǵanda 29 myń gektarǵa artty. Nátıjesinde bıylǵy aýyl sharýashylyǵynyń jalpy ónim kólemi 376,5 mlrd teńgege jetip otyr.
