Túımebaev Ońtústikti damytýdyń jańa Tujyrymdamasyn ázirledi
ASTANA. QazAqparat - Ońtústik Qazaqstan oblysynyń jańa Damý tujyrymdamasy jasaldy.
Oblys ákimi Janseıit Túımebaev qyzmetine kiriskeli úsh aıda óńirdiń barlyq aýdan-qalalaryn aralap, olardyń áleýmettik-ekonomıkalyq jaǵdaıymen jete tanysyp shyqty. Jergilikti turǵyndarmen, qoǵamnyń belsendi azamattarymen jıi kezdesip, halyqtyń ortasyndaǵy mańyzdy máselelerdi anyqtady. Nátıjesinde barlyq salany qamtıtyn Ońtústik Qazaqstan oblysynyń jańa Damý kontseptsııasy daıyndaldy, dep habarlady OQO ákiminiń baspasóz qyzmetinen.
Ońtústikte sońǵy toqsanda Indýstrııaldy-ınnovatsııalyq damý baǵdarlamasy aıasynda 7 mlrd. teńgeni quraıtyn 17 joba iske qosylyp, 735 jumys orny ashyldy. Indýstrııalyq aımaqtarda 9 ınvestıtsııalyq joba júzege asyrylyp, 4,3 mlrd. teńge ınvestıtsııa tartyldy. 400 jańa jumys orny ashyldy. Atalǵan ýaqyt kezeńinde oblys ákiminiń bastamasymen Shymkent qalasynda kógaldandyrý jańasha qarqyn alyp, 52 myń kóshet, 300 myń qyzǵaldaq jáne raýshan gúlderi egildi. Oblys ortalyǵynyń kenjelep qalǵan shetki aýdandaryn damytyp, qaraýsyz qalǵan saı-salalardy saıaly saıabaqqa aınaldyrý maqsatynda «Shatqal» baǵdarlamasy qabyldandy.
Elimizdegi erekshe joba 14 qańtar kúni bastaldy. Atalǵan joba aıasynda sáýir aıyna deıin 100 myń tal otyrǵyzylady. Nátıjesinde ondaǵan shatqal saıabaqqa aınalady. Ońtústikke ınvestıtsııa tartý maqsatynda tuńǵysh ret «Týǵan jerdi túletý - perzenttik paryz» respýblıkalyq aktsııasy ótip, óńirimizden shyqqan ataqty metsenattarmen oblystyń erekshe jobalaryn qarjylandyrýǵa kelisimder túzilýde.
Kásip ashýdy kózdegen isker azamattarǵa jer berý boıynsha 14 qaýlyǵa qol qoıýdy tezdetip, bir aptada sheshim shyǵarý úrdisi engizildi. Ońtústikte týrızm klasterin damytýdyń aýqymdy jospary jasala bastady.
«EKSPO-2017» halyqaralyq mamandandyrylǵan kórmesine óńirlik daıyndyq aıasynda qonaqtarǵa arnap, Ońtústik Qazaqstan oblysy boıynsha 3 jáne 5-kúndik týrıstik marshrýttar jasaldy. "Recommended by EXPO" belgisi berilip, "Shymtýr", "Sael týr" jáne "Mıras trevel" týrıstik uıymdarymen memorandýmǵa qol qoıyldy.
Elbasy tapsyrmasyna sáıkes úsh iri megapolıstiń birine aınalýdy josparlaǵan Shymkenttiń sáýlettik, ınfraqurylymdyq jobasyna jańa baǵyttar engizildi. Memlekettik túrli baǵdarlamalar arqyly úı salý, turǵyndarǵa usyný máselesi Táýelsizdiktiń 25 jyldyǵy aıasynda óte belsendi júrgizildi. Sońǵy úsh aıda 1865 páter paıdalanýǵa berildi. Osy kezeńmen toqtamaı aldaǵy ýaqytta da «Nurly jer» baǵdarlamasy arqyly kópqabatty úı turǵyzý barynsha qarqyn alady.
«Túrkistan 2017 jyly Túrki áleminiń mádenı astanasy» degen halyqaralyq mártebeni ıelendi. Endi jyl kóleminde Túrkistanda halyqaralyq deńgeıde tartymdy mádenı sharalar bastalady. Bul Ońtústiktiń mádenıeti men ónerin tanytý úshin tyń serpin beredi.
