Túımebaev ońtústikqazaqstandyqtardyń saýaldaryna tikeleı efırde jaýap berdi
ShYMKENT. QazAqparat - Ońtústik Qazaqstan oblysynyń ákimi Janseıit Túımebaev jergilikti telearnalardyń birinde tikeleı efırde suhbat berdi.
«Ákim saǵaty» habarynda óńir basshysy QR Prezıdenti Nursultan Nazarbaevtyń «Qazaqstannyń úshinshi jańǵyrýy: jahandyq básekege qabilettilik» atty Joldaýynyń oblysta júzege asyrylýy boıynsha baıandap, aımaq turǵyndarynan túsken saýaldarǵa jaýap berdi, dep habarlaıdy QazAqparat HAA tilshisi.
Bas-aıaǵy bir jarym saǵatqa sozylǵan júzdesýde arnaıy mamandardan quralǵan «Call-ortalyqqa» saýaldar telefon, elektrondy poshta, Whatsapp jelisi jáne Ońtústik Qazaqstan oblystyq ákimdiginiń Facebook-tegi resmı paraqshasy arqyly joldanyp, aımaq jurtshylyǵy ózderin tolǵandyrǵan máselelerge jaýaptar aldy. Tikeleı efır kezinde, saýaldardyń basym bóligi Whatsapp jelisi arqyly kelip, ondaǵy negizgi suraqtar aýyl sharýashylyǵy, jumyspen qamtý, kásipkerlik, kommýnaldyq sharýashylyq, bilim, densaýlyq saqtaý, týrızmdi damytý syndy mańyzdy salalarǵa qatysty boldy.
Elimizdiń ózge oblystarynan habarlasqan kórermender aımaq basshysymen tikeleı beınesuraq arqyly dıdarlasyp, tolǵandyrǵan máselesiniń jaýabyn alyp, usynystaryn joldaı aldy. Jalpy, óńir ákimimen bolǵan tikeleı efırge jalpy sany 600-den astam suraq joldandy. Sanaýly ýaqyt ishinde kelip túsken saýaldarǵa meılinshe jaýap bergen J. Túımebaev turǵyndardyń máselesin der kezinde sheshýge atsalysatynyn jetkizdi.
Aıta ketý qajet, ákimmen suhbat barysynda jaýap berilip úlgerilmegen saýaldardyń jaýaby aldaǵy ýaqytta oblys ákiminiń resmı saıtynda jarııalanatyn bolady.
