Túımebaev OQO-da jeke menshikke ótip ketken sý arnalaryn memleketke qaıtarýdy tezdetýdi tapsyrdy
ShYMKENT. QazAqparat - Ońtústik Qazaqstan oblysynyń ákimi Janseıit Túımebaev jumys saparymen Maqtaral aýdanynda boldy, dep habarlaıdy oblys ákimdiginiń baspasóz qyzmeti. Onda aımaq basshysy birqatar áleýmettik nysandar men ónerkásip oryndarynyń jumysymen tanysyp, jergilikti halyqpen tildesti.
Eń aldymen, óńir basshysy Shardara sý qoımasynan sý sorǵysh nasostar arqyly «Dostyq» kanalyna aǵyn sý beretin stansany kórdi. Dál osy stansadan aǵyn sý alatyn «Táýelsizdiktiń 20 jyldyǵy» atyndaǵy kanal QR Aýylsharýashylyǵy mınıstrliginiń Sý resýrstar komıtetiniń tapsyrysymen 2011 jyly salynyp, paıdalanýǵa berilgen bolatyn. Sekýndyna 60 tekshe metrge deıin sý tartatyn sý sorǵyshtar 87 myń gektarǵa jýyq alqapty aǵyn sýmen qamtamasyz ete alady. Al atalǵan nysanǵa jańǵyrtý jumystary júrgiziletin bolsa qosymsha taǵy 34 myń gektardaı jerdi sý arnasy arqyly aǵyn sýmen qamtamasyz etýge bolady.
Jyl saıyn maqtashylar úshin sý jetispeýshiligi áli de baıqalatynyn aımaq basshysynyń aldynda baıandaǵan Maqtaral aýdanynyń ákimi Ǵalym Ismaılov búgingi tańda jergilikti ákimdikpen kezinde jeke menshikke ótip ketken sý arnalaryn memleket menshigine ótkizý jumystarynyń qolǵa alynyp jatqanyn jetkizdi. Aýdandaǵy jaǵdaıǵa qanyqqan Janseıit Qanseıituly jergilikti basshyǵa bul jumystardy tezdetip aıaqtap, halyqqa ońtaıly jaǵdaı jasaýdy tapsyrdy.
Munan soń, oblys ákimi bastaǵan jumysshy top aýdannyń J.Eralıev aýyldyq okrýgine qarasty S.Seıfýllın aýylyna bolyp el qarııalarymen kezdesti. Olarmen emen-jarqyn áńgimelesken J.Túımebaev ondaǵy turǵyndar jaǵdaıynyń durystalyp, rettelgenine kóz jetkizdi.
Eske sala ketsek, osy jyldyń tamyz aıynyń basynda atalǵan eldi mekendegi turǵyndar arasynda buzaqylyq is-áreketter oryn alǵan bolatyn.
Qazaq-tájik etnostarynyń baıyrǵy baýyrlas, týys elder ekenine toqtalǵan ákim bul tatýlyqtyń máńgilikke jalǵasatynyna senim bildirdi. Sondaı-aq, atalǵan eldi mekende búgin bolǵan jas jubaılardyń úılený toıyna qatysyp, syı-sııapat jasady.
Aıta keteıik, J.Eralıev aýyldyq okrýginde 14 myńnan astam halyq tursa, sonyń eki myńǵa jýyǵy S.Seıfýllın aýylynyń turǵyndary. Jergilikti halyq, negizinen, egin sharýashylyǵymen aınalysady.
Aýdandaǵy ındýstrıaldy aımaqtyń jumysymen tanysý oblys ákiminiń búgingi jumys saparynyń josparynda da boldy. Ótken jyly aımaqta jumysyn bastaǵan «Bereke MMA» maqta óńdeý zaýyty týraly baıandaǵan jergilikti basshy búginde munda kúrish óńdeý zaýytynyń qurylysy júrip jatqanyn jetkizdi. Sonymen birge, ol ındýstrıaldy aımaqtan «Polıetılen óndirisi», «Sanıtarlyq-gıgenalyq zattar óndirisi», «Jemis-jıdekti qaıta óńdeý zaýyty» jobalary iske qosylyp, toqyma klasterin damytý úshin maqtany tereń óńdeý óndiristerine 12 ga jer telimin berý josparlanyp jatqanyn habarlady.
Aımaqtaǵy jumystardyń barysyn tyńdaǵan óńir basshysy búginge deıin munda bir ǵana jobanyń jumysyn bastaǵanyn synǵa alyp, qalǵan jobalardy tezdetip iske qosýdy júktedi.
Jumys toby Qazaq maqta sharýashylyǵy ǵylymı-zertteý ınstıtýtynda da boldy. Maqta sharýashylyǵyndaǵy ǵylymı-zertteýlerdi damytý arqyly otandyq básekege qabiletti maqtanyń jańa sorttaryn shyǵaryp, maqta óndirýdiń tıimdiligin arttyrý. Innovatsııalyq tehnologııalardy óndiriske endirýmen aınalysatyn ortalyqta sońǵy jyldary 30-dan astam ınnovatsııalyq tehnologııalar jasalynǵan. Sonymen qatar, ortalyqta 2000 jyldan bastap básekege qabiletti maqtanyń otandyq suryptary shyǵarylyp, jalpy egistiktiń 85%-na endirildi.
Instıtýt qyzmetkerleriniń osynaý jetisterin oń baǵalaǵan ákim ǵalymdar jumysyna sáttilik tiledi.
Maqtaly aımaqqa barǵan aımaq basshysy J.Nurlybaev aýyldyq okrýgine qarasty Qaraqyr aýylynan paıdalanýǵa berilgen jańa mekteptiń ashylý saltanatyna qatysty. 200 balaǵa shaqtalǵan orta mektepte oqýshylardyń jan-jaqty bilim alýyna barlyq jaǵdaılar jasalǵan.
Bilim ordasynyń synyp bólmelerin aralap, shákirttermen tildesken J.Túımebaev oqýshylardy jańa mektepti úzdik aıaqtap, elimizdiń damýyna atsalysýǵa shaqyrdy.
Aıta keteıik, aýdan boıynsha 2016-2017 jańa oqý jylynda mektepterde 67 200 oqýshy bilim alýda. Bıyl aýdanda 10 bilim ordasy paıdalanýǵa berildi.
Jumys saparynyń qorytyndy jıyny aýdan aktıviniń otyrysymen jalǵasty. Maqtaraldy 9 aıda atqarylǵan jumystardyń barysymen tanystyrǵan aýdan basshysy ózekti máselelerdi de ortaǵa saldy.
Baıandalǵan problemalar jaıyna qanyqqan J.Túımebaev olardyń óz kezegimen sheshiletinin jetkizdi. Bul rette, ákim qoldaǵy bar múmkindikti tıimdi paıdalanyp, aýdan ıgiligi úshin qoldanýdy mindettedi. Mysal retinde, ol Maqtaraldaǵy 2006 jyldan beri toqtap turǵan óndiris ornyn basqa da maqsatta paıdalanýdy aıtty.
Bıýdjetti ıgerý, ınvestıtsııa tartý, maqta alqaby kóbeıse de, onyń túsimdiliginiń azaıýy, veterınarııa, qylmys, densaýlyq saqtaý syndy kóptegen mańyzdy salalarda aıtarlyqtaı tómen kórsetkishterdiń baıqalǵanyn alǵa tartqan Janseıit Qanseıituly Maqtaral aýdanynyń ákimi Ǵalym Ismaılovqa joǵarydaǵy túıtkilderdi tez arada retke keltirýdi júktedi.
