Túımebaev: Oblysymyzda jer qoınaýyn zańsyz paıdalanýǵa jol berilmeýi kerek
Jıynda «Jer qoınaýyn zańsyz paıdalanýdy toqtatý jáne kelisim shart boıynsha júrgizilip jatqan jumystardyń barysy týraly» oblystyq tabıǵı resýrstar jáne tabıǵat paıdalanýdy retteý basqarmasynyń basshysy Ilıas Quramysov baıandama jasady. Basqarma basshysynyń aıtýynsha, sońǵy jyldary Saıram aýdany arqyly ótetin «Aq sý», «Saıram sý» ózenderiniń jaǵalaýlarynda zańsyz jer qoınaýyn paıdalaný faktileri jıi tirkelip otyr.
«Birinshi kezekte Saıram aýdany Aqsý ózeni boıyndaǵy 12 kásiporynǵa tekserý taǵaıyndalyp, jer ýchaskeleriniń nysanaly maqsatqa saı paıdalanbaǵany anyqtaldy. Odan bólek, turaqty túrde reıdtik sharalar uıymdastyrý kezinde bıyl 15 derek faktini anyqtadyq. Jalpy, ishki ister organdarynda aǵymdaǵy jyly jer qoınaýyn zańsyz óndirý boıynsha 80 derek tirkeldi. Onyń ishinde 41- is óndiristen qysqartylsa, 4 - is óndiriste, 32 - is ákimshilik shara kórý úshin oblystyq ekologııa departamentine joldanǵan. Ekologııa departamenti tarapynan 20 zańdy jáne jeke tulǵaǵa - 2,7 mln teńge aıyppul salyndy. Onyń óndirilgeni 1,93 mln teńgeni quraıdy», - dedi Ilıas Quramysov.
2017 jyldyń sáýir aıynan bastap Saıram aýdanynda 12 nysan tekserilip, zań buzýshylyqtardy joıý jóninde berilgen nusqamalardyń 3 aılyq merzimi ótkenimen, búgingi kúnge kásiporyndarǵa naqty sharalar qabyldanbaǵan. Bir qyzyǵy, búginge deıin oblys boıynsha birde - bir zańsyz jer qoınaýyn paıdalanýshy qylmystyq jaýapkershilikke tartylmapty. Sebebi, keltirilgen zardap 1 000 aılyq eseptik kórsetkishten aspasa, ákimshilik jaýapkershilik sheginde qarastyrylady.
«Oblysta 166 zańdy jer qoınaýyn paıdalanýshylarǵa kelisimshart berilgen bolatyn. Solardyń tek 65-ǵana jer ýchaskeleri karer retinde rásimdelgen, al qalǵan 101 jer ýchaskesi aýyl sharýashylyǵy maqsatyndaǵy jerler esebinde tur. Jer qoınaýyn paıdalanýshylar tarapynan jer ýchaskesin paıdalaný zańdylyǵyn jáne jer ýchaskeleriniń quqyq berý qujattarynyń zańdylyǵyna basty nazar aýdaryp, tekserý jumystary júrgizilsin», - dedi Janseıit Qanseıituly.
Óńir basshysy jer qoınaýyn zańsyz paıdalaný faktilerin aldyn-alý nemese joıý jumystaryn báseńdetkeni úshin salaǵa jaýapty qyzmetkerlerge qatań tártiptik shara qoldanýdy tapsyrdy. Osy rette aýyl okrýgteriniń ákimderi men ýchaskelik polıtsııanyń qyzmetine sáıkestigi tekseriletin boldy.
