Túımebaev negizgi 19 taýardyń baǵasyn turaqtandyrýdy tapsyrdy
ASTANA. QazAqparat - Ońtústik Qazaqstan oblysynda azyq-túlik baǵasyn turaqtandyrý maqsatynda ózimizde óndiriletin jáne shetten tasymaldanatyn azyq-túlik taýarlaryna saraptama júrgizilýi tıis. Ol úshin arnaıy jospar quryp, monıtorıng jasalýy qajet. Ekinshiden, ózimizde óndirilgen taýarlardy saqtaý máselesine mán berýimiz qajet. Búgin bul týraly selektorlyq jıynda oblys ákimi Janseıit Túımebaev málim etti.
Kún tártibinde alǵashqy bolyp áleýmettik mańyzy bar azyq-túlik taýarlary men janar-jaǵar maı baǵasyn turaqtandyrý sharalary, sondaı-aq turaqtandyrý qorynyń jumysy talqylandy. Bul týraly oblystyq kásipkerlik, ındýstrııaldy-ınnovatsııalyq damý jáne týrızm basqarmasynyń basshysy Batyrhan Qurmanseıit baıandama jasady. Onyń atap ótýinshe, óńirde ahýal turaqty jáne taýarlarǵa degen jetispeýshik baıqalmaıdy.
«Qazan aıynda áleýmettik azyq-túlik taýarlary tizbesindegi 2 taýardyń baǵasynyń ósimi baıqalady. Máselen, kartop 17 paıyzǵa, ıaǵnı 100 teńgeden 117 teńgege ósti. Súzbe 9,4 paıyzǵa, ıaǵnı 1408 teńgeden 1541 teńgege kóterilgen. Desek te, qyryqqabat 6,8 paıyzǵa tómendep otyr» - dedi Batyrhan Qurmanseıit.
Jyl basynan baǵa ózgerisine áser etýshi faktorlar retinde AI-92 markaly benzınniń 22,1 paıyzǵa, dızel otyny 19,8 paıyzǵa, kommýnaldyq tarıfter boıynsha jylý 12,2 paıyzǵa, kárizdiń 13,3 paıyzǵa, sýdyń 13,3 paıyzǵa, elektr energııasynyń 1,3 paıyzǵa qymbattaýy sebep bolyp otyr. Al qazan aıynda benzın AI-92 markasynyń baǵasy 11,4 paıyzǵa, dızel otyny 6,9 paıyzǵa ósken.
Óńirdegi ahýalǵa qanyqqan oblys ákimi qazan aıynda oblystaǵy ınflıatsııa deńgeıi 6,1 paıyzdy quraǵanyn, onyń ishinde azyq-túlik taýarlarynyń qymbattaýy 4,3 paıyzdy, azyq-túlik emes taýarlar 8,6 paıyzdy, aqyly qyzmetter 5,8 paıyzdy quraǵanyn aıtyp ótti.
«Birinshiden negizgi 19 taýardyń túrine baǵany durystaýymyz qajet. Barlyq basqarmalar, aýdan, qala ákimderi daıyndyq jumystaryn kúsheıtý kerek. Ekinshi másele - osy taýar túrlerin óndirgende saqtaý máselesine mán berýimiz tıis. Bul rette, Saıram aýdanyndaǵy syıymdylyǵy 40 myń tonna qoımany tıimdi paıdalanýdy tapsyramyn», - dedi Janseıit Qanseıituly.
Aıta keteıik, baǵany turaqtandyrý maqsatynda oblysta arnaıy shtab qurylyp, tıisti is-shara jospary bekitilgen. Jyl sońyna deıin Shymkent qalasynda 20 áleýmettik dúken ashylmaq. Sondaı-aq Qajymuqan atyndaǵy ortalyq stadıon mańynan úlken áleýmettik bazar qurý máselesi de qarastyrylýda.
