Túımebaev qurylysta otandyq ónimderdi paıdalanýǵa shaqyrdy
ShYMKENT. QazAqparat - Shymkent qalasynda jańa qurylys materıaldarynyń kórmesi ótti. Kórmeni aralap kórgen Ońtústik Qazaqstan oblysynyń ákimi Janseıit Túımebaev qurylysta otandyq ónimderdi paıdalanýǵa shaqyrdy, dep habarlaıdy QazAqparat tilshisi.
Aýqymdy shara jergilikti taýar óndirýshilerdiń sheteldik qurylys materıaldaryn almastyra alatynyn kórsetý maqsatynda uıymdastyryldy. Kórmede aımaq basshysy jergilikti taýar óndirýshilerdiń ónimderin barynsha paıdalaný qurylys sapasyn arttyryp, kásipkerlikti damytýǵa septigin tıgizetinin atap ótti.
Qurylys kompanııalarynyń áleýetimen tanysyp shyqqan óńir basshysy eń birinshi sapaǵa mán berýdi tapsyrdy. Sonda ǵana básekege qabiletti orta qalyptastyrýǵa bolady degen ákim aldaǵy ýaqytta qurylys buıymdarynyń ımportyn azaıtýǵa kúsh salýdy júktedi.
«Ońtústik Qazaqstan oblysynda qurylys buıymdarynyń ımporty óńir qajettiliginiń 80 paıyzyn quraıdy. Polımerden jasalatyn tusqaǵazdar men jabyndylar tolyǵymen syrttan tasymaldanady. Osy úrdisti azaıtýymyz qajet. Ol úshin óńirimizdegi shıkizattardy tıimdi paıdalanyp, qaıta óńdeý máselesine kóńil bólý kerek», - dedi Janseıit Qanseıituly.
Aıta keteıik, búginde oblys aýmaǵynda negizgi qurylys materıaldarynyń jáne konstrýktsııalarynyń 50-den astam túri shyǵarylady. Al qurylysqa arnalǵan jabdyqtar, buıymdar men konstrýktsııalar shyǵaratyn 30 iri jáne orta kásiporyn men 120-dan astam tseh jumys isteıdi.
Munan soń óńir basshysy Shymkent qalasyndaǵy «Ońtústik Qurylys Servıs» JShS-niń temir beton shyǵaratyn zaýytyna aıaldap, kásiporyndy aralap kórdi. 2001 jyly iske qosylǵan zaýyt búginde temir betonnyń 100-den astam túrin shyǵarady. Kásiporyn 2014 jyly 1 mlrd teńge ınvestıtsııa tartyp, qaıta jańǵyrtylǵan. Osy jumystardyń arqasynda zaýyt jylyna 150 myń tekshe metr qurylys matarıaldaryn shyǵarýǵa qol jetkizip otyr. Qazir munda 200 adam turaqty jumyspen qamtylǵan.
