Túımebaev ishki jáne syrtqy naryqty ıgergen iri zaýyttarda boldy

ShYMKENT. QazAqparat - Ońtústik Qazaqstan oblysynyń ákimi Janseıit Túımebaev «Ońtústik» ındýstrıaldy aımaqta bolyp, ondaǵy birqatar iri kásiporyndardyń jumysymen tanysty. Ondaǵy kásipkerlerge memleket tarapynan kórsetiletin qoldaýlardy atap ótip,  óńir ekonomıkasynyń damýyna aıtarlyqtaı úles qosyp otyrǵan isker azamattarmen pikir almasty, dep habarlaıdy QazAqparat HAA tilshisi.

Oblys ákimi birinshi kezekte shyny ydystar óndirisimen tanymal «Evrokrıstall» zaýytynyń jumysymen tanysty. Ondaǵy óndiriletin ónimderdi gazdalǵan sýsyndar men shyryndar, alkogoldik, sút jáne dári-dármekter shyǵaratyn zaýyttar qoldanady. Munda túrli kólemdegi - 200 ml-den 3 lıtrge deıingi tússiz jáne jasyl tústi bótelkeler men qutylar shyǵarylady. Osynaý ónimderge Qazaqstannyń barlyq aımaǵy men Qyrǵyzstannan tapsyrystar kelip túsýde. Jylyna 60 mln dana shyny shyǵarýǵa qaýqarly óndiris ornynda 150 adam jumyspen qamtylǵan.

Zaýyt jumysymen tanystyrǵan  kásiporyn ıesi aımaq basshysyna jumys isteý aıasyn keńeıtip, kómirqyshqyl gazyn óndirýdi qolǵa alyp jatqanyn jetkizdi.  Ol úshin kásipker arnaıy ıtalııalyq qurylǵylardy da satyp alýdy josparlap qoıǵan.

Munan bólek, aımaq basshysy  shıfer shyǵaratyn kásiporyn «Tectum Enjineering» JShS-ni aralap kórdi.

Shıfer óndiretin alǵashqy kásiporyn «Bıznestiń jol kartasy - 2020» baǵdarlamasy aıasynda qarjylandyrylǵan. Joba quny 1,9 mlrd teńgeni quraıdy. Zaýyt «Hatchek» ádisimen ónim shyǵarady. Munda 200 adam jumyspen qamtylyp, shyǵarylǵan ónimniń 60 paıyzy ishki naryqqa, al qalǵan 40 paıyzy Tájikstan, Aýǵanstan men Ózbekstan  elderine jóneltilýde. Zaýyt jylyna 2,3 mln dana shıfer óndirý múmkindigine ıe.

Indýstrıaldy aımaqqa jasaǵan sapary barysynda oblys ákimi «Shymkent Temir» JShS-niń bolat quıý zaýytynyń qurylysymen de tanysty. 2018 jyly iske qosylatyn óndiristiń jalpy quny - 4,2 mlrd teńge. Jylyna 240 myń tonna ónim shyǵarýǵa qaýqarly kásiporyn iske qosylǵanda 150 azamat jumyspen qamtylmaq.

 

Sondaı-aq, ákim shyny óndirisinde sheteldik kompanııalardan kem túspeıtin ári sáýlet qurylysynda qoldanýǵa yńǵaıly áınek shyǵaratyn  «Fırma Dana» zaýytynyń ónimimen tanysty. Zaýyt táýligine 1700 sharshy metr áınek shyǵarady. Jańa tehnologııaǵa negizdelgen shyny qysta úıdegi jylýdy saqtasa, jazda bólmedegi temperatýrany birqalypty kúıde ustap turady. Bul shynylardyń tıimdiligi jylý ótkizgishtiginde.

Sapar sońynda oblys ákimi Janseıit Túımebaev «Ońtústik» ındýstrıaldyq aımaǵy óńirdegi aýdan, qalaǵa úlgi bolýy kerektigin aıtyp, onda ornalasqan kásiporyndardyń jumysyn oń baǵalady.

Aıta keteıik, «Ońtústik» ındýstrıaldy aımaqta jalpy somasy 55,8 mlrd  teńge bolatyn bes myń jumys ornyn ashý kózdelgen  85 joba júzege asyrylýda.  Búgingi tańda munda quny 21,4 mlrd teńgeniń 46 jobasy iske qosylyp, úsh myń adam jumyspen qamtyldy.