Túımebaev Báıdibek aýdanynyń áleýetin barlyq salada paıdalanýdy júktedi
ASTANA. QazAqparat - Ońtústik Qazaqstan oblysy Báıdibek aýdanynyń potentsıaly áli de bolsa tolyq paıdalanylmaı keledi. Bul rette jalpy aýmaǵy 60 gektardy quraıtyn «Shaıan» ındýstrıaldy aımaǵynyń tıimdiligin arttyryp, negizgi óndiris oshaqtaryn osynda shoǵyrlandyrý qajet.
Sondaı-aq jergilikti kásipkerlerdiń qulshynysyn arttyratyn tyń ári ilkimdi jobalardyń ázirlenýine mán bergen jón. Bul týraly Báıdibek aýdanyna issaparmen baryp, atqarylǵan jumystardyń barysymen tanysqan Ońtústik Qazaqstan oblysynyń ákimi Janseıit Túımebaev málim etti.
Óńir basshysy aldymen Boraldaı aýyldyq okrýgine qarasty Talap eldimekenindegi «Taý Alma Baq» JShS-niń jumysymen tanys boldy. Atalǵan kásiporyn quryltaıshylar esebinen jalpy quny 2 mıllıon AQSh dollaryn quraıtyn 43 gektarǵa qarqyndy baý otyrǵyzǵan. 2013 jyly qolǵa alynǵan jobanyń maqsaty - baý kólemin 83 gektarǵa jetkizý. 107 gektar jerdi tolyq qorshap, kásibin dóńgeletip otyrǵan mekeme aldaǵy ýaqytta ár gektardan 50 tonnaǵa deıin ónim alýdy josparlap otyr. Seriktestik basshysy Seıtjappar Ábdýsadyquly oblys ákimine almadan bólek jańǵaq egý isin de qolǵa alyp otyrǵanyn jetkizdi.
«Boraıdaı aýyl okrýginiń taýly aýmaǵy alma egýge óte qolaıly. Sondyqtan baýdyń kólemin jyl sanap arttyryp, jańǵaq egýdi de qolǵa alǵanyńyzdy quptaımyn. Aldaǵy ýaqytta ózge okrýgterden de baý egýdi qolaǵa alsańyz, aýdan ákimdigi tarapynan barlyq qoldaýlar kórsetiletin bolady», - dedi Janseıit Qanseıituly.
Báıdibek aýdany maqsarysymen aty shyqqan óńir. Búginde bul daqylǵa shetelden de suranys kóp. Byltyr aýdanda 23 myń gektarǵa maqsary egilse, onyń kólemi bıyl 43 myń gektarǵa jetken. Sharýalar búginde gektaryna 7-8 tsentnerden ónim alyp, oblystaǵy maı óndirýshi kásiporyndardy shıkizatpen qamtamasyz etip otyr. Jol boıy oraq naýqanyn qyzdyryp jatqan sharýalardyń jumysymen tanysqan óńir basshysy aldaǵy jyldary aýdannan maqsary maıyn óndiretin kásiporyn ashýǵa keńes berdi.
Munan soń oblys ákimi Boraldaı aýyl okrýgindegi «Aberdın-Angýs» tuqymdy iri qara mal sharýashylyǵyna baryp, jeke kásipker Maqsat Nazarbaevtyń jumys júıesimen tanys boldy. 2015 jyly qurylǵan sharýashylyq qorasynda búginde 154 asyl tuqymdy mal basy bar. 3500 gektar jeri bar qojalyq aldaǵy ýaqytta mal basyn 2 myńǵa jetkizýdi josparlaýda.
Oblys ákimi «Shaıan» ındýstrıaldy aımaǵyna da atbasyn buryp, ondaǵy iske asqaly otyrǵan jobalardyń barysymen tanysty. Jalpy aýmaǵy 60 gektardy quraıtyn aımaq búginde barlyq ınfraqurylymdyq qajettiliktermen qamtylǵan. Endigi másele - ınvestorlar tartyp, jańa jumys oryndaryn kóptep ashatyn kásiporyndardy shoǵyrlandyrý.
«Indýstrıaldy aımaqtyń múmkindigin tıimdi paıdalana almaı otyrsyzdar. Áli kúnge munda kásiporyn qurý jumystary qolǵa alynbaı keledi. Osy rette aýdan ákiminiń jumysyna syn aıtýǵa bolady. Jyl sońyna deıin naqty iske asyrylatyn jobalardy talqylap, aldaǵy jyly kásiporyndardy tezdetip ashýdy tapsyramyn», - dedi oblys ákimi.
Munan soń óńir basshysy Aqbastaý aýyldyq okrýgindegi «Domalaq ana» kesenesi aýmaǵyndaǵy jibek óndiretin qojalyqtyń jumysymen tanysty. Jibek óndirýdi qolǵa alǵan kásiporyn búginniń ózinde sol mańǵa 140 myń túp tut otyrǵyzǵan. Bıyl qojalyq Shaıan aýylynan «ON -Báıdibek» qolóner ortalyǵyn ashyp, jibekten kilem toqý, kıizden shulyq basý, qazaqy oıý-órnektpen shapan tigý isin de jandandyryp otyr.
Budan bólek, aýdanda Arab ınvestory Sheıh Halıfanyń qus ósirý ortalyǵy kún sanap damyp keledi. 895 gektar jerdi alyp otyrǵan kásiporyn 3,5 mlrd teńge shetel ınvestıtsııasyn tartyp, dýadaq qusy túriniń basyn 4 myńǵa jetkizgen. Jylyna bıýdjetke 700 mln teńge salyq tóleıtin ınvestorlar jobanyń úshinshi kezeńin iske asyryp, jumysshylar sanyn 400-ge arttyrýdy josparlaýda. Sondaı-aq sheteldik kásiporyn aýdandaǵy 5 áleýmettik nysannyń qurylysyn óz qarajatyna júrgizýge nıet etip otyr. Atalǵan kásiporynǵa arnaıy barǵan oblys ákimi mundaǵy arqarylǵan jumystarǵa da oń baǵasyn berdi.
