Túımebaev: Baqsha ónimderi men kókónisti soltústikte de ósirý qajet
ShYMKENT. QazAqparat - Búgin Ońtústik Qazaqstan oblysynyń ortalyǵy - Shymkentte «Óńiraralyq eńbek utqyrlyǵyn damytýdyń bıznes-forýmy» ótti, dep habarlaıdy QazAqparat HAA tilshisi.
Jıynǵa Ońtústik Qazaqstan oblysynyń ákimi Janseıit Túımebaev, QR Eńbek jáne halyqty áleýmettik qorǵaý mınıstri Tamara Dúısenova, Qostanaı, Pavlodar, Soltústik Qazaqstan jáne Shyǵys Qazaqstan oblystary ákimderiniń orynbasarlary, OQO qalalary men aýdandarynyń ákimderi, joǵaryda keltirilgen óńirlerdegi jumyspen qamtýdy jáne áleýmettik baǵdarlamalardy úılestirý basqarmalarynyń, halyqty jumyspen qamtý ortalyqtarynyń basshylary, jumys berýshiler jáne taǵy basqa da taraptar qatysty.
Forým jumysyn ashqan Ońtústik Qazaqstan oblysynyń ákimi Janseıit Túımebaev óńir halqynyń tyǵyzdyǵyna oraı, munda jyl saıyn aýyl sharýashylyǵy, kásipkerlik syndy mańyzdy salalarda atqarylyp jatqan jumystardyń jaıyna toqtaldy. Jyl sońyna deıin kúngeıden teriskeıge 400 myń tonnaǵa jýyq baqsha, 250 myń tonna kókónis, 15 myń tonna jemis-jıdek, 15 myń tonna júzim jóneltýge múmkindiktiń bar ekenin, sáıkesinshe, ol jaqtan bıdaı, kartop, mal azyqtyq jem ónimderin almastyryp, óńiraralyq kooperatıvter júıesin qalyptastyrý joldaryna mán berý qajettigin jetkizdi.
«Búginde Ońtústiktiń baqsha ónimderi onsyz da myńdaǵan shaqyrymǵa tasymaldanyp, tipti Reseıge de ótkizilip jatyr. Al sol kókónisti ósirýdi soltústik óńirlerde jolǵa qoıyp, shekara asyrý áldeqaıda tıimdi bolady dep oılaımyn. Sonymen qatar sharýalar soltústikten ońtústikke jetkiziletin aýyl sharýashylyǵy ónimderin de molynan daıyndap, osynda jiberýine múmkindik týady. Bul óz kezeginde elimizdegi azyq-túlik naryǵyn retteýge ońdy yqpal etetindigi sózsiz», - dedi Túımebaev.
