Túıeni soqqan kóliktegi áıel 10 kún jansaqtaý bóliminde jatty
AQTAÝ. QazAqparat - Mańǵystaý oblystyq aýrýhanasyna jol-kólik apaty saldarynan kóptegen dene jaraqattarymen jetkizilgen áıeldiń jaǵdaıy qazir turaqty, dep habarlaıdy «QazAqparat» HAA «Lada»-ǵa silteme jasap.
Oblystyq densaýlyq saqtaý basqarmasynyń baspasóz qyzmetiniń habarlaýynsha, zardap shekken áıel bas súıek-mı zaqymyn alǵan, mıy aýyr zaqymdalǵan, 1-shi dárejeli komaǵa túsken, bet súıegi birneshe jerden synǵan, keýde tusynyń jaraqatyn alǵan, sondaı-aq ókpesine zaqym kelgen.
Qazirgi kezde naýqastyń jaǵdaıy turaqty. 4 jeltoqsanda ol neırohırýrgııa bóliminiń jalpy palatasyna aýystyryldy.
Eske sala keteıik, jol apaty qarashanyń 21-nen 22-ne qaraǵan túni Aqtaý-Jetibaı kúre jolynda boldy. Toyota Hiace kóligi túıemen soqtyǵysqan.
Jol-kólik oqıǵasynyń saldarynan 1999 jyly dúnıege kelgen er azamat qaza taýyp, zardap shekken taǵy eki adam Jetibaı aýdandyq aýrýhanasyna jetkizilgen. Er adam kórsetilgen medıtsınalyq kómekten keıin úıine jiberilse, Mańǵystaý oblystyq aýrýhanasyna jetkizilgen áıel komaǵa túsken.
