Túıemdi 2 mln teńgege suraǵandar boldy – túıeshi kelinshek
QYZYLORDA. KAZINFORM – Qyzylorda oblysynyń Qazaly aýdanynda turatyn Tańsholpan Faızrahmanovany jergilikti jurt túıeshi kelinshek retinde tanıdy.
Keıipkerimiz – bir emes, eki qyzyl dıplomnyń ıesi. Birinshi mamandyǵy – býhgalter-ekonomıst, ekinshi mamandyǵy – bastaýysh synyp muǵalimi. Alaıda ol karera qýǵan joq. Eki mamandyq boıynsha jumys istemedi. 14 jyl buryn Qazalyǵa kelin bolyp túsip, sonda ósip-óndi. 2019 jyldan beri joldasymen birge osy aýdannyń Sháken aýyldyq okrýgine qarasty Saıqudyq degen malshy aýylǵa kóship, atakásippen aınalysyp keledi.
- Áýelgi kezde shóp shaýyp, ony satyp kúnelttik. Keıin jer alyp, qoı, sıyr, jylqy basyn kóbeıttik. Túıe sharýashylyǵyna den qoıǵaly bes jylǵa jýyqtady. Kásibimiz eki bas túıe satyp alýdan bastaldy. Ózim bala kúnimnen bul túlikti kórip óskenmin, ákem asyrady. Sondyqtan maǵan tańsyq bolǵan joq. 5 jylda 50-ge jýyq túıe jınappyz, - dedi Tańsholpan Faızrahmanova.
Oısylqara tuqymy eki jylda bir týady, bul qorada jyl saıyn 8-9 shaqty bota dúnıege keledi. Keıipkerimiz kúndelikti 5 túıe saýyp, odan 10 lıtrdeı sút alady. Saýyn túıelerge ózi at qoıǵan. Barlyq túlikti bes saýsaǵyndaı biledi. Olardyń buǵan baýyr basqany sondaı, qasyna ózge eshkimdi jýytpaıtyn kórinedi.
Tańsholpan Faızrahmanova Tik-Tok áleýmettik jelisindegi paraqshasyn birneshe jyldan beri belsendi túrde júrgizip keledi. Atap óterligi, onyń tanymaldyǵyn arttyrǵan – osy kıeli janýar.
– Bári maǵan erkelep turady. Ózderi adam sııaqty, saǵynady. Eki-úsh kún úıde bolmasam, kelgenimde aldymnan júgirip shyǵady. Iyǵyma basyn qoıady. Janary móldirep turady. Jaralanǵan, qurttap ketken kezde kózinen ádettegiden kóp jas aǵady. Men ony janyna batqan soń jylap tur dep túsinemin. Blogerlikpen alǵashqyda kópshilikke aýyldyń kúndelikti tynys-tirshiligin kórsetý úshin aınalysyp júrdim. Al qazirgi kezde halyqqa kóbine túıelermen túsken vıdeolarym ótedi. Osyndaı jazbalarymnan keıin túıe sharýashylyǵyna qyzyǵyp, keńes suraǵandar óte kóp. Tipti túıeme quda túskender boldy, - dedi keıipkerimiz.
Erkosha esimdi túligin byltyr 2 mln teńgege surap kelgen. Alaıda qımastyq sezimnen usynystan bas tartypty. Ol kezde bir túıeniń naryqtaǵy quny 1 mln teńge shamasynda eken. Bıyl baǵasy sharyqtap, 1 mln 400 myń teńgege deıin jetken. Sút, qurty men shubatyn satýdan túsetin paıdany qosa eseptegende keıipkerimizdiń aılyq tabysy 500-600 myń teńgeden asady.
- Túıe sharýashylyǵy basqa túlikterge qaraǵanda asa qıyn emes. Óıtkeni túıe ózimen-ózi júredi, óz tamaǵyn ózi taýyp jeıdi. Shólge tózimdiligi sondaı, esigimizdiń aldynda aǵyp turǵan bulaqqa barmaıdy. 10-15 kún, keıde bir aı boıy sýsyz júre beredi. Bul – kóp kútimdi qajet etpeıtin janýar. Baǵasy qymbat, eti tátti, súti men shubaty paıdaly. Tabysy otbasymyzdy asyraýǵa ábden jetkilikti, - dedi Tańsholpan Faızrahmanova.
Ol túıe baǵýdy oılap júrgenderge túlikti jergilikti jerden alýǵa keńes berdi. «Basqa jaqtan bolsa, qashyp ketýge beıim turady, óıtkeni mekenin saǵynady» deıdi.
Buǵan deıin habarlaǵanymyzdaı, jýyrda Qyzylorda oblysynyń Aral aýdanynda túıe sútinen qurǵaq untaq shyǵaratyn zaýyt iske qosyldy.
