Túıeler baıqaýyna 15 mln. dollar tigildi
ASTANA. 20 jeltoqsan. QazAqparat - Birikken Arab Ámirlikterinde jyl saıyn ótetin dástúrli túıe baıqaýy bıyl da jalǵasyn tabady. Jarysqa 25 myńnan asa janýar qatysady. Atalmysh baıqaýǵa túıesiniń baǵyn synaý úshin Saýd Arabııasynan, Katardan jáne Omannan myńdaǵan adam keldi.
Atalmysh baıqaýǵa qatysý úshin arnaıy tirkeýden ótken túıeler túr-turpatyna, jas shamasyna, t.b. qaraı jiktelip, top-topqa bólinedi. Ádilqazylar alqasy túıeniń symbatyn olardyń túr-turpatyna qarap anyqtaıdy. Túıeniń moıny men sıraǵynyń uzyndyǵy, órkeshi, basy men qulaǵy, t.b. túzýligi men formasy esepke alynady. Baıqaýdyń júldesine 15 mln. dollar tigilgenin aıta ketý kerek.
Arab elderinde túıe ustamaıtyn adam kemde-kem. Arab ómiriniń ajyramas bir bóligine aınalǵan tórt túliktiń tóresi - túıeniń qadir-qasıeti joǵary. Arabtar túıeniń shýdasy men shubatyn da, terisi men etin de paıdalanady. Shól kemesi atanyp túıeni kólik retinde áli kúnge deıin paıdalanady, dep jazady muslim.kz .
