Túıe júninen toqylǵan buıymdarǵa suranys artyp keledi – sheber
AQTÓBE. KAZINFORM – Amangúl Eshmaǵambetov sharýalardan túıe júnin satyp alyp, odan túrli kıim-keshek, oıynshyq toqıdy. Qazirgi kezde jyly ári emdik qasıeti bar buıymdaryn áleýmettik jeli arqyly saýdalap otyr.
Áıelder kóbine qyz jasaýyn tigip, oıýly kórpe daıyndaǵandy qolaıly kóredi. Aqtóbe óńirinde de bıznestiń osy túrin qol kóretinder kóp. Sonymen birge qolynan is keletin qyz-kelinshekter, zeınettegi analar toqyma toqıdy. Aqtóbe oblysy Shalqar qalasynyń turǵyny Amangúl Eshpanova 2021 jyly grant alyp, qyz jasaýyn bastady. Keıin «Bir aýyl – bir ónim» jobasyna qatysyp, túıe júninen túrli buıym toqı bastady. Búginde bas kıim, moıyn shalǵy, qolǵap pen shulyq, keýdeshe, tizeni, beldi jyly ustaıtyn arnaıy buıym toqıdy.
– Aldymen túıe júnin satyp alamyn. Aýylda kelisi 2 myń teńgege satylady. Jýyp, tútip, ıirgen soń ǵana túrli buıym toqýǵa bolady. Munyń bárin ózim isteımin. Jýyp bolǵan soń keptirip, asyqpaı tútemin. Eger júnniń túsin ózgertkim kelse qyna nemese qalampyr salyp qaınatyp, tabıǵı jolmen boıap alamyn. Balalar men ereksekterge túrli kıim toqımyn. Sonymen birge jumsaq oıynshyq toqyp kórip, úırendim. Oıynshyqqa da qyzyǵatyndar bar eken. Alaıda qysta qolǵap pen shulyqqa tapsyrys berýshi kóp, - dedi Amangúl Eshpanova.
Sheber túıe júninen toqylǵan buıymdardyń emdik qasıeti bar ekenin aıtady.
– Tabıǵı ónim qashanda qunyn joǵaltpaıdy. Jylqy qylynan ultaraq jasap jatyr mańǵystaýlyqtar. Al túıe júninen toqylǵan buıym býyn aýrýyna em. Qazirgi kezde elimizdiń ár túkpirinen tapsyrys beredi. Sonymen birge qolǵa bilezik toqyp, monshaqpen kómkergem. Ulttyq naqysh dep qyzdar satyp alyp jatyr. Byltyr almatylyqtar shulyqqa tapsyrysty kóp berdi. Janymda bir jumysshy bar. Sharýany ekeýmiz atqaramyz. Armanym – úlken bızneske jol bastaý. Biraq onyń retin bilmeı otyrmyn. Brend qalyptastyryp, adam densaýlyǵyna paıdaly dúnıelerdi aınalymǵa shyǵarǵym keledi. Suranys bar, toqyǵan dúnıem tez satylyp ketedi, - sheber.
Amangúl Eshpanova bar jumysty bala kezden kórip, bilip ósti. Anasy shulyq pen qolǵapty ózi toqyp, kıindirdi. Tipti aýyl balalaryna da toqyp berdi.
– Anam qazir 90 jasta. Ózine uqsaǵanym úshin alǵys aıtady. Qazir sonyń jolyn men jalǵap kelemin. Ásirese tizege arnalǵan toqymany jas ta, kári de alady. 30 jastaǵy balasynyń tizesi syrqarap, em úshin satyp aldy. Egde jastaǵy qarııalar da kıedi. Ózim taksı nemese poıyzǵa salyp jiberemin. Olar kútip alady. Tabys – osy. Bir nárseniń shyńyna shyqqan jaqsy. Іziń qalady, isiń qalady. Arman bar, oǵan jetý jolyn bilmeı otyrmyn. Bálkim oqyp, bilim alý kerek shyǵar. Ózim qyz jasaýyn da qatar daıyndaımyn. Senim artyp, tapsyrys bergenderdiń kóńilin qaldyrǵan emespin, - deıdi ol.
Aıta keteıik, Amangúl Eshpanova buǵan deıin qurylys salasynda eńbek etken. Koronavırýs ınfektsııasy órship, adamdar úıden shyǵa almaı qalǵan kezde qolónerdi damytqanyn aıtady. Sodan beri osy saladan nápaqasyn taýyp júr.
Eske salsaq, aqtóbelik muǵalim Birlik Soltan tórt túlik súıeginen kádesyı jasap júr. Jylqynyń qaraqusy bir qaraǵanda sıyrǵa, ekinshi jaǵyn aınaldyrǵanda qoshqarǵa uqsaıdy. Al sıyrdyń aýyz omyrtqasynan mysyq pen qyran qusty kóremiz.