Túıe ústinde jamby atý: Qazaq qyzy álemdik rekord ornatty
ASTANA. KAZINFORM — Qazaqstanda sporttyń erekshe túrinen jańa rekord tirkeldi. Sadaqshy Dınara Saıdalına «Qarataý» esimdi túıemen 100 metr qashyqtyqtaǵy 4 nysanany nebári 9 sekýnd 72 mıllısekýndta atyp túsirdi.
Bul jetistik «Topjarǵan» óner ortalyǵynyń tarıhyndaǵy besinshi rekord. Rekord ıesi bul nátıjege jetý úshin 1,5 aı boıy tynymsyz daıyndalǵanyn aıtady.
Dınaranyń sózinshe, túıeniń ústinde tepe-teńdik saqtaý atqa mingennen áldeqaıda qıyn.
— Bul jetistikke jetkendegi sezimdi sózben aıtyp jetkizý múmkin emes. Daıyndyq óte aýyr boldy, 1,5 aı boıy kún saıyn tańǵy 9-dan keshki 6-ǵa deıin túıeniń ústinde júrdik. Túıeniń shabysy atqa múlde uqsamaıdy, ol aspanǵa qaraı julqyp, sekirip shabady. Ondaı sátte tepe-teńdik saqtaı otyryp, oqty qoramsaptan sýyryp alyp, nysanany dál kózdeý — úlken sheberlikti talap etedi. Tórtinshi nysanany atyp, rekord ornatyldy degendi estigende kózime jas keldi, — deıdi Dınara Jibek Joly telearnasynyń «Búgin LIVE» baǵdarlamasynda.
Rekordty uıymdastyrýshy ári «Topjarǵan» ortalyǵynyń jetekshisi Ǵabıt Tańatovtyń aıtýynsha, bul joba túıeniń jaıbasar janýar degen túsinikti buzý úshin qolǵa alǵan.
— Kópshilik túıeni jaı júretin janýar dep oılaıdy. Biz osy zertteý jumystaryn júrgizip, túıeniń babyn, tamaǵyn, ýaqytyn qadaǵalap, arnaıy joba jasadyq. Bul — úlken eńbektiń arqasy. Túıeni shaýyp júrýge úıretý ońaı emes, ony seziný kerek. Alda josparymyz óte kóp. Endi eki túıeniń ústinde tik turyp shaýyp, jańa rekordtar ornatýdy kózdep otyrmyz, — deıdi jetekshi.
Rekord ornatqan «Qarataý» túıesi 5 jasta, salmaǵy 800 keli. Jamby atýshy Dınara Saıdalına sporttyń bul túrine osydan bir jyl buryn ǵana kelgen. Aldaǵy ýaqytta sportshy men onyń ujymy túıemen báıgege qatysýdy da josparlap otyr.
Aıta keteıik, buǵan deıin jamby atý, kókpar, báıge sııaqty otandyq at sportynyń búgingi beınesine sholý jasaǵan edik.
