Túıe tólin satyp alý sýbsıdııasy bir basqa 175 myń teńgege deıin arttyrylmaq

ASTANA. KAZINFORM — Túıe tólin satyp alý sýbsıdııasy bir basqa 175 myń teńgege deıin arttyrylmaq. Bul týraly Májilis depýtattarynyń saýalyna Premer-mınıstr Oljas Bektenovtiń jaýabynda aıtylǵan.

— Úkimet mal sharýashylyǵy salasyn, sonyń ishinde túıe sharýashylyǵyn damytý, mal basyn kóbeıtý, memlekettik qoldaý sharalaryn usyný jáne ónimdi tıimdi ótkizý baǵytynda jumys júrgizip keledi. Osy salany yntalandyrý maqsatynda Asyl tuqymdy mal sharýashylyǵyn damytýdy, mal sharýashylyǵy ónimderiniń ónimdiligi men sapasyn arttyrýdy sýbsıdııalaý qaǵıdalarynyń aıasynda memlekettik qoldaý sharalary kózdelgen, sonyń ishinde asyl tuqymdy atalyq túıe satyp alýdy sýbsıdııalaý qarastyrylǵan, — dep atap ótedi Úkimet basshysy.

Onyń málimetinsha, asyl tuqymdy janýarlar qunynyń ósýine baılanysty túıe tólin satyp alýǵa arnalǵan sýbsıdııa mólsherin bir basqa 100 myń teńgeden 175 myń teńgege deıin arttyrýdy kózdeıtin ózgerister men tolyqtyrýlar engizý boıynsha jumys júrgizilip jatyr.

— Budan basqa, túıe sútin óndirý men qaıta óńdeýdi sýbsıdııalaý júzege asyrylýda. Onyń normatıvi bıyl maýsym aıynda 1 kelisine 55 teńgeden 190 teńgege deıin ulǵaıtyldy, — dedi Oljas Bektenov.

Buǵan deıin Almatyda qurǵaq túıe sútin jasaǵan kontrafaktilik óndiris orny anyqtalǵan bolatyn.