Túıe sútin eksporttaýdan Gınnes rekordyna deıin: Sydyq Dáýletovtiń joly
ASTANA. KAZINFORM — Gınnestiń rekordtar kitabyna engen túıe sharýashylyǵynyń ıesi Sydyq Dáýletov Jibek Joly arnasynyń «Búgin LIVE» baǵdarlamasynda erekshe jetistikke qalaı qol jetkizgenin baıandady.
— Gınneske bastapqyda mal sany boıynsha ótkimiz keldi. Keıin bir kúnde beriletin sút kólemimen baq synamaq boldyq. Biraq ekeýi de talapqa saı kelmedi. Sodan soń bir órkeshti túıeden quralǵan kerýendi bir shaqyrym qashyqtyqqa júrgizip, tizimge endik, — deıdi ol.
Alaıda rekordqa daıyndyq kútkennen qıyn bolǵan.
— Erkindikte júretin túıe 7 jastan asqan bolý kerek. Analyq túıeler kerek boldy. 4 shaqyrym araqashyqtyq saqtalýy tıis. Bas úıretýge 3 aı, jalpy daıyndyqqa 6 aı ketti. Qazaqstanda kóshtiń toqtaǵanyna 100 jyldan asty. Biz Jibek jolyn osylaısha jańǵyrttyq, — deıdi sharýashylyq ıesi.
Sydyq Dáýletov qazaq halqynyń túıemen tyǵyz baılanysty tarıhyna da toqtaldy.
— Tehnologııa damyǵansha biz túıemen kóship-qondyq. Shańyraǵymyzdy, kıiz úıimizdi arttyq. Sondyqtan biz túıege qaryzdarmyz, — deıdi ol.
Bastapqy jospar boıynsha kerýenge 1000 túıe qatysýy tıis edi. Biraq tájirıbeli jetekshilerdiń jetispeýi, kıimniń túsi, drondardyń áseri sııaqty faktorlar talapty buzǵan.
— Syrttan tájirıbeli adamdar ákelý kerek boldy. Kıimniń túsi de mańyzdy eken. Drondar ushqanda túıe úrkidi. Sharttar buzyldy. Nátıjesinde 252 bir órkeshti túıe júrip ótti. «Qazaqtyń úlken túıe kerýeni» sertıfıkatyn aldyq. Bastysy, jeńdik, — dedi ol.
Sharýashylyq ıesi Qytaıda buryn 365 qosórkeshti túıeden quralǵan kerýen júrip ótkenin eske saldy.
— Olardyń túıe tuqymy bólek. Bizdiki sırek kezdesetin arýana, bir órkeshti túıeler, — deıdi Dáýletov.
Áńgime barysynda spıker óziniń túıe sharýashylyǵy jaıly aqparat berdi.
— Qazir 5 myń bas túıe ósiremiz, onyń 1000-y qos órkeshti. Aldaǵy jyldary túıe sanyn 10 myńǵa jetkizgimiz keledi. Qazaqta jer jetkilikti, ol túıe ósirýge qolaıly. Jalpy 600 adam jumys isteıdi. Mal sharýashylyǵyna sýbsıdııa kóbeıedi degendi estidik. Bul úlken qoldaý bolar edi, — deıdi kásipker.
Sydyq Dáýletov túıe sútiniń eksporttyq naryǵy týraly aıtty.
— 2019 jyldan beri túıe sútin eksporttaý múmkin boldy. Bul — Prezıdent Qasym-Jomart Toqaevtyń Qytaıǵa saparynan keıin ashylǵan baǵyt. Ónimniń 80 paıyzy Qytaıǵa jiberiledi, sondaı-aq Reseıge eksporttaımyz, — dedi sharýashylyq basshysy.
Eske sala keteıik, jaqynda Prezıdent mal sharýashylyǵynyń áleýetin barynsha paıdalaný qajettigin aıtty.