Túıe palýan Ǵanı Seıdildaev «Astana qyrany» atandy
ASTANA. 9 shilde. QazAqparat - Keshe Astanadaǵy «Dáýlet» sport kesheninde QR Prezıdenti N.Nazarbaevtyń júldesi úshin qazaq kúresinen «Qazaqstan barysy» týrnıriniń «Astana qyrany» irikteý jarysy ótti.
Bul básekeni Astana qalasynyń ákimdigi men Týrızm, dene tárbıesi jáne sport basqarmasy uıymdastyrǵan bolatyn. Aqtyq synda QR Eńbek sińirgen sport sheberleri, Azııa chempıony, Álemniń 2 dúrkin chempıony Ǵanı Seıdildaev Qazaqstannyń jáne Azııanyń chempıony Darhan Bıjanovtan basym túsip, «Astana qyrany» atandy. Sport basqarmasynyń baspasóz qyzmetiniń habarlaýynsha, túıe palýandardyń saıysyn bastaǵan Ǵanı alǵashqy saıysta Álibek Baısenovti 19-sekýndta, 1/4 fınalda Tólegen Jetpispaevty 23 sekýndta jeńdi. Al jartylaı fınalda Azat Kenjebekovti utty.
«Jaýjúrek» degen laqap aty bar Ǵanı Seıdildaev jeńimpazǵa tigilgen 1 mıllıon teńgeni qaltasyna saldy, onyń ıyǵyna altynmen qaptalǵan shapan jabylyp, beline «Altyn belbeý» taǵyldy. Ekinshi oryndy ıelengen «Erke bala» Darhan Bıjanov 300 myń teńge men kúmispen kúptelgen shapandy qanaǵat tutty. Úshinshi orynǵa ıe bolǵan Azat Kenjebekov pen Álibek Zekenov dıplomdar men 100 myń teńgeden syıaqy aldy. Endi «Astana qyranynda» 1-2 oryndy bóliskender qyrkúıek aıynda Astanada jalaýyn kóteretin «Qazaqstan barysy» dodasynda elordanyń namysyn qorǵaıtyn bolady.
