Túıe balýandar saıysynda qazaqstandyq utylyp qaldy

ASTANA. QazAqparat - Astanada ótip jatqan qazaq kúresinen álem chempıonatynyń túıe balýandar saıysynda el namysyn qorǵap jatqan astanalyq balýan Aıbat Seıten túıe balýandar saıysynyń shırek fınalynda utylyp qaldy, dep habarlaıdy QazAqparat tilshisi.

Ol shırek fınalda tájikstandyq balýan Dadahon Qurbanalıevten jeńilip qaldy. Osylaısha qazaq balýandary úshin álem chempıonaty aıaqtaldy.

Esterińizge sala keteıik, eki kúnniń qorytyndysy boıynsha Qazaqstan balýandary 6 altyn, bir qola medal enshilep jalpy esepte top jardy.

Jarystyń alǵashqy kúni 55 kelide óner kórsetken Marat Nyǵmatýllaev, 82 keli salmaqta synǵa túsken balýanymyz Ersultan Muzafarov jáne 90 keli salmaqta Ádiljan Ystybaev chempıon atansa, asa aýyr salmaqta Rýsylan Ábdirazaqov qola medal jeńip aldy.

Álem birinshiliginiń sońǵy kúni taǵy da el qorjynyna úsh altyn medal tústi. Bul kúni  60 keli Qýanysh Ysqaqov, 66 keli  salmaqta Qasymhan Tólenbaı jáne 74 keli salmaqta Ǵalymjan Ábdirahmanov chempıon atandy.

Bas júldeni jeńip alǵan balýanǵa 2 myń, ekinshi oryn ıegerlerine 1 myń, al úshinshi oryn alǵandar 500 AQSh dollaryna ıe boldy.

Jalpy, álem birinshiligine 40 memleketten 166 balýan kelip qatysty. Olar 9 salmaq dárejesinde 40 medal jıyntyǵyn sarapqa saldy. 

Foto baq.kz