Tývadaǵy «Patshalar ańǵarynan» tabylǵan eskertkishter saq mádenıetin tereń zertteýge jol ashady
ASTANA. KAZINFORM – Reseıdiń Tyva Respýblıkasyndaǵy «Patshalar ańǵarynda» erte saq dáýirine jatatyn Týnnýg qorǵanyn qazý kezinde buryn-sońdy teńdesi tabylmaǵan eki tas eskertkish anyqtaldy. Arheologterdiń aıtýynsha, bul oljalar saq mádenıetiniń qalyptasý kezeńin tereńirek zertteýge jol ashady, dep habarlaıdy TASS.
Ekspedıtsııa jetekshisi, Reseı ǵylym akademııasy Materıaldyq mádenıet tarıhy ınstıtýtynyń ǵylymı qyzmetkeri Tımýr Sadyqovtyń aıtýynsha, bıyl tabylǵan eki stelanyń ázirge naqty balamasy joq.
«Bıyl biz buryn-sońdy naqty uqsasy kezdespegen eki stelany taptyq. Qazba barysynda anyqtalǵan ártúrli buıymdar alys óńirlerden tabylatyn uqsas jádigerlermen salystyrylǵan kezde, olardyń ózara baılanysy qanshalyqty jaqyn bolǵanyn túsinýge múmkindik beredi. Bul ótpeli kezeń eskertkishi bolǵandyqtan, jańa mádenı nysandardyń paıda bolýy men mádenı transformatsııa úderisin kózben kórýge bolady. Keıbir kútpegen oljalardyń mánin birden túsindirýdiń ózi qıyn», – dedi Tımýr Sadykov.
Mamandardyń pikirinshe, qazba barysynda tabylǵan zattardyń alýan túrliligi bul jerde alys aımaqtardan kelgen adamdardyń bolǵanyn kórsetedi. Sondyqtan Týnnýg qorǵany mádenı ózgerister kezeńin beıneleıtin biregeı arheologııalyq eskertkish sanalady.
Týnnýg qorǵany aldy-bel mádenıetine jatady jáne osy mádenıetke qatysty belgili eskertkishterdiń ishindegi eń kónesi bolyp esepteledi.
Qazba jumystary josparly túrde júrgizilip jatyr. Qorǵan men ony qorshaǵan qurylymdardyń jalpy aýmaǵy shamamen 19 myń sharshy metrdi quraıdy. Arheologter batpaqty jerde jumys istep, aǵash, saz, topyraq jáne tas qabattaryn arshýǵa májbúr.
Aıta keteıik, ǵalymdar Altyn Orda dáýirine tıesili jańa eskertkishterdi zerttep jatyr.
