Týý kórsetkishi artty, ólim-jitim tómendedi: statıstıka ne deıdi
ASTANA. KAZINFORM — Qazaqstanda 2026 jyldyń basynan beri demografııalyq kórsetkishter jaqsaryp keledi: týý deńgeıi ósip, jalpy, ana jáne náreste ólimi aıtarlyqtaı tómendegen. Sarapshylar bul oń ózgeristerdi densaýlyq saqtaý júıesindegi reformalar men medıtsınalyq kómektiń qoljetimdiliginiń artýymen baılanystyrady. Bul týraly Densaýlyq saqtaý mınıstrligi málim etti.
Qazaqstanda medıtsınalyq-demografııalyq kórsetkishter turaqty túrde jaqsaryp keledi. Ulttyq statıstıka bıýrosynyń málimetteri boıynsha 2026 jyldyń qańtar aıynda ótken jyldyń osy kezeńimen salystyrǵanda:
- týý kórsetkishi 1,8%-ǵa artty (14,49-dan 14,75-ke deıin);
- jalpy ólim 8,4%-ǵa tómendedi (6,2-den 5,68-ge deıin);
- náreste ólimi 28,5%-ǵa azaıdy (6,66-dan 4,76-ǵa deıin). Sondaı-aq 2026 jyldyń alǵashqy eki aıynda ana ólimi 49,4%-ǵa tómendep, 100 myń tiri týǵan balaǵa shaqqanda 16,2-den 8,2-ge deıin azaıdy.
Ólimniń negizgi sebepteri retinde tómendegi kórsetkishter ataldy:
- qanaınalym júıesi aýrýlarynan — 13,9%-ǵa, onyń ishinde:
- jedel mıokard ınfarktynan — 6,5%-ǵa,
- ınsýltten — 7,8%-ǵa;
- qaterli isikterden — 7,4%-ǵa;
- jazataıym oqıǵalardan, jaraqattar men ýlanýlardan — 2,3%-ǵa;
- tynys alý júıesi aýrýlarynan — 18,7%-ǵa turaqty tómendeýi baıqalady.
Bul kórsetkish densaýlyq saqtaý júıesin damytý, profılaktıkalyq baǵdarlamalardy keńeıtý, medıtsınalyq kómektiń qoljetimdiligin arttyrý, sondaı-aq zamanaýı dıagnostıka jáne emdeý ádisterin engizý boıynsha júrgizilip jatqan júıeli jumystyń nátıjesi ekenin aıta ketý qajet.
Eske sala keteıik, buǵan deıin Densaýlyq saqtaý mınıstrligi eldegi pedıatrııalyq qyzmetti kúsheıtip jatqanyn jazdyq.