Tutynýshylyq nesıe naryǵyndaǵy problemalar qalaı retteledi
«Zań jobasynda eki aýqymdy baǵyt qamtylǵan. Birinshi baǵyt - qarjy sektoryn retteýdiń táýelsiz organyn qurý. Eldiń ekonomıkalyq ósýine yntalandyrý úshin Ulttyq bank ortalyq banktiń klassıkalyq qyzmetterine shoǵyrlanýǵa nıetti. Bul baǵa turaqtylyǵyn qamtamasyz etý, aqsha-kredıt saıasaty, valıýtalyq retteý jáne tólem júıelerin damytý. Al qarjy naryǵyn retteý men damytý, sondaı-aq tutynýshylardyń quqyqtaryn qorǵaý fýnktsııalaryn jańadan qurylatyn Qarjy naryqtaryn retteý men damytý agenttigine berý usynylyp otyr», - dedi QR Ulttyq bankiniń tóraǵasy Erbolat Dosaev.
Onyń sózine qaraǵanda, jańa Agenttik Ulttyq Bank sııaqty QR Prezıdentine tikeleı baǵyný jáne respýblıkalyq bıýdjet esebinen qarjylandyrý usynyldy. Sonymen qatar qyzmetshilerdiń mártebesi Ulttyq Bank qyzmetshileriniń mártebesindeı bolady. UB men jańa agenttiktiń qyzmeti tyǵyz úılesedi. Qarjylyq turaqtylyqty qamtamasyz etý maqsatynda Ulttyq Bank pen Agenttik Qarjylyq turaqtylyq jónindegi keńestiń qyzmeti sheńberinde ózara is-qımyl jasaıdy.
Munymen qosa, qaıtalaýdy boldyrmaý jáne qarjy sektoryna júktemeni azaıtý maqsatynda Qazaqstan Ulttyq Banki men Agenttik úshin birdeı qoljetimdi bolýymen statıstıkalyq jáne retteýshilik aqparattyń biryńǵaı bazasy qurylady.
E Dosaevtyń aıtýy boıynsha zań jobasynyń ekinshi baǵyty bul -retteýshi arbıtraj jáne tutynýshylyq kredıtteý naryǵynda júıelik problemalardy joıý.
«Halyqtyń boryshtyq júktemesiniń baqylanbaı ósýine jol bermeý maqsatynda barlyq kredıtteý sýbektilerine qatysty tıisti retteý men qadaǵalaý quraldaryn engizý talap etiledi», - dep habarlady ol.
Búginde tutynýshylyq kredıtter portfeliniń neǵurlym belsendi ósýi rettelmeıtin sektorda baıqalady - ol onlaın-kredıtorlar, kredıttik seriktestikter jáne lombardtar. Sonymen qatar, rettelmeıtin sýbektiler tarapynan qaryz alýshylardyń quqyqtary men múddeleriniń buzylaýy baıqalady
«Atalǵan problemalardy sheshý úshin qadaǵalaý organynyń retteý aýqymyna kredıtteýdiń barlyq sýbektilerin engize otyryp, ony keńeıtý usynylady. Zań jobasynda banktik emes kredıttik uıymdardy retteýdiń saralanǵan júıesin engizý kózdeledi», - dedi E. Dosaev.
Ulttyq Bank tóraǵasy zań jobasynda árbir kórsetilgen sýbektiniń qoldanystaǵy bıznes-úlgisin ózgertý kózdelmeıtinin, tek qyzmettiń naqty túrine tán táýekelderge baılanysty talaptar engiziletinin atap ótti.