Tutynýshylarǵa 415 mln teńgeniń jylý aqysy qaıtarylady

NUR-SULTAN. QazAqparat – 2020-2021 jylǵy jylý maýsymynyń qorytyndysy boıynsha tutynýshylarǵa 415 mln teńgeniń jylý aqysy qaıtarylady. Bul týraly QR Ulttyq ekonomıka mınıstrligi Tabıǵı monopolııalardy retteý komıteti tóraǵasynyń mindetin atqarýshy Ashat Japsarbaı málim etti, dep habarlaıdy QazAqparat tilshisi.

«Komıtet pen onyń aýmaqtyq bólimshelerine 2020 jylǵa ınvestıtsııalyq baǵdarlamalar men tarıf smetalaryn oryndaý týraly 1 203 tabıǵı monopolııa sýbektisinen 2 341 esep kelip tústi. Onyń ishinde búgingi kúni 798 sýbektiniń 1 389 esebi qaraldy. Qolda bar esepterdi taldaý nátıjesinde 266 sýbektiniń óz mindettemesin oryndamaǵany anyqtaldy. Osyǵan baılanysty eldiń barlyq óńirlerinde jalpy somasy 10,2 mlrd teńgege ýaqytsha ótem tarıfteri bekitildi. Bul tarıftiń ósýin tejeıtin tetik ekenin aıtý kerek», - dedi ol ortalyq komýnıkatsııalar qyzmetinde ótken brıfıngide.

Komıtet tóraǵasynyń mindetin atqarýshy esepter áli qaralyp jatqanyn eske salyp, ýaqytsha ótem tarıfteriniń somasy áli kóbeıýi múmkin ekenin aıtty.

Sonymen qatar, Ashat Japsarbaı 2020-2021 jyldardaǵy jylý berý maýsymynda tutynýshylarǵa 415 mln teńgeden astam qarajat qaıtarylatynyn habarlady.

«Qarajatty qaıta esepteý tutynýshynyń jeke shotynda kórinis tabady jáne jańa jylytý maýsymy bastalǵannan bastap avans (saldo) túrinde jeke jolmen jazylady», - dep túsindirdi komıtet basshysy.