Tutynýshylardyń «Jaıyqjylýqýat» AQ-ǵa qaryzy 380 mln teńgeni qurap otyr
ORAL. QazAqparat - Qazirgi tańda tutynýshylardyń «Jaıyqjylýqýat» AQ-ǵa qaryzy shamamen 380 mln teńgeni qurap otyr. Bul týraly búgin óńirlik kommýnkatsııalar qyzmeti alańynda «Jaıyqjylýqýat» AQ bas dırektory Murat Báımenov málim etti, dep habarlaıdy «QazAqparat» tilshisi.
Onyń aıtýynsha, qaryzdy qaıtarý baǵytynda barynsha pármendi sharalar alynýda. Atap aıtqanda, boryshkerler sotqa beriledi. Sottyń sheshimderimen 54 avtokólik, 491 páter tutqyndaldy. Bul múlikterdi azamattar sata almaıdy, kepilge de qoıa almaıdy. Odan basqa 227 adamnyń shetelge shyǵýyna shekteý qoıyldy.
Sonymen birge jylytý maýsymyna daıyndyq barysynda kásiporynda 369,14 mln teńgeni (Oral jylý-qýat ortalyǵy boıynsha - 208,083 mln jáne jylý jelileri boıynsha - 161,060 mln teńge) ıgerý josparlanǵan bolatyn. Jylý-qýat ortalyǵyndaǵy barlyq jumystar merziminde oryndaldy. Sondaı-aq 8,823 km jylý jelileri aýystyryldy. Synaq jumystary da júrgizildi.
Aıta keteıik, BQO energetıka jáne turǵyn úı-kommýnaldyq sharýashylyq basqarmasynyń málimetine qaraǵanda, aýdandardaǵy áleýmettik nysandarǵa 4,2 myń tonna kómir jáne 1,04 myń tonna suıyq otyn qajet. Kúni búgin áleýmettik nysandarǵa 4,03 myń tonna kómir (97 paıyz) jáne 0,72 myń tonna suıyq otyn (6 paıyz) jetkizildi. Qalǵany aýdan ákimdikteri jáne merdigerler arasynda jasalǵan kelisimsharttarda kórsetilgen merzimderge sáıkes jetkiziletin bolady.
Oblystaǵy 640 bilim berý nysany jylytý maýsymyna tolyq ázir. 397 densaýlyq saqtaý nysanynyń 394-i (99 paıyz), 383 áleýmettik nysandardyń 379-i (99 paıyz) daıyn.
Batys Qazaqstan oblysyndaǵy 1322 turǵyn úılerdiń 1286-synda gıdravlıkalyq synaýlar júrgizildi (97 paıyz). Turǵyn úıler daıyndyq qujattaryn 1 qazanǵa deıin alýy tıis.
