Tutynýshylardyń quqyqtaryn qorǵaý ombýdsmeni qandaı mindetter atqarady

ASTANA. QazAqparat – Premer-Mınıstrdiń orynabsary – Saýda jáne ıntegratsııa mınıstri Serik Jumanǵarın tutynýshylardyń quqyqtaryn qorǵaý ombýdsmeni qandaı mindetter atqaratynyn aıtty, dep habarlaıdy QazAqparat tilshisi.

«Mınıstrlik tutynýshylardyń quqyqtaryn qorǵaý júıesin transformatsııalaýdy bastady. Ázirlengen zań jobalarynda kelesi negizgi jańalyqtar qamtylǵan.

Birinshiden, osy saladaǵy ombýdsmen ınstıtýtynyń engizilýimen tutynýshylardyń quqyqtaryn qorǵaý salasy kúsheıtiledi», - dedi mınıstr Úkimet otyrysynda.

Vedomstvo basshysynyń málimetinshe, ombdýdsmenniń mindetine tutynýshylardyń belgisiz tobynyń quqyqtaryn qorǵaý, naryq taraptarynyń múddeleriniń tepe-teńdigin saqtaý fýnktsııalary kirmek.

«Ekinshiden, tutynýshylardyń shaǵymdaryn qaraýdyń bıýrokratııalyq tórt satyly algorıtmdi eki satyly algorıtmge jeńildetý kózdelip otyr.

Úshinshiden, kásipkerlik sýbektilerin tutynýshynyń zańdy talaptaryn erikti túrde qanaǵattandyrýǵa yntalandyrý maqsatynda sottyń sheshimi boıynsha tutynýshynyń paıdasyna aıyppul túrinde azamattyq quqyqtyq jaýapkershilikti engizý.

Tórtinshiden, kommýnaldyq, kóliktik, medıtsınalyq, týrıstik qyzmetter, baılanys qyzmetteri jáne kásipkerlik sýbektileri kórsetetin ózge de qyzmetter salalaryna tutynýshylardyń quqyqtaryn qorǵaýdyń bazalyq qaǵıdattaryn taratý.

Besinshiden, onlaın-saýda segmentindegi zańnamalyq olqylyqtardyń ornyn toltyrý jáne basqa novellalar.

Aıtylǵan túzetýlerdiń nátıjesinde tutynýshylardyń quqyqtaryn qorǵaý salasyndaǵy memlekettik retteýge azamattardyń qanaǵattaný deńgeıi 2025 jylǵa qaraı 80%-ǵa deıin jetkiziledi», - dedi Serik Jumanǵarın.