Tutynýshylardyń 11 paıyzy ǵana quqyǵyn qorǵaý úshin memorgandarǵa júginedi - vıtse-mınıstr
«Tutynýshylardyń quqyǵyn qorǵaýdyń ulttyq modelin qalyptastyrý kezinde birshama máselege nazar aýdarylyp otyr. Atap aıtqanda, ózin-ózi retteý ınstıtýtyn damytý esebinen bıznestiń ózin-ózi tazartýy, óz quqyqtary men múddelerin qorǵaý máselelerinde halyqtyń habardar bolýy, qoǵamdyq baqylaýdy kúsheıtý arqyly bızneske ákimshilik qysymdy tómendetý, tutynýshylyq daýlardy sotqa deıingi tártipte tıimdi qaraýdyń quqyqtyq negizderin qurýǵa basymdyq beriledi. Bizdiń oıymyzsha osyndaı model ǵana protseske qatysýshylardyń bárine paıdaly bolmaq. Búgingi tańda tutynýshylardyń quqyqtaryn qorǵaýdyń ulttyq júıesi barlyq memlekettik organ men 208 úkimettik emes uıymnyń jumysyn qamtıdy. Alaıda ózara is-qımyldyń naqty rettelmeýi – halqymyzdyń quqyqtaryn qorǵaýdyń sapaly deńgeıin qamtamasyz etpeıdi», - deıdi Qaırat Tórebaev.
Vıtse-mınıstrdiń sózine sensek, halyqtyń tutynýshylar quqyǵyn qorǵaý júıesine qanaǵattanyp otyrǵan joq. Áleýmettik zertteýge qatysqandardyń 87 paıyzy tutynýshy retinde quqyǵynyń buzylǵanyn rastaǵan.
«Óz quqyǵy men zańdy múddesin qorǵaýǵa azamattardyń 64 paıyzy nıetti emes ekenin atap ótti. Buǵan bıznestiń jazasyzdyǵy men kimdiki durys, kimdiki teris ekenin dáleldeýdiń uzaqtyǵy sebep bolyp otyr. Óz quqyqtaryn qorǵaý úshin ýákiletti memlekettik organdarǵa tutynýshylardyń 11 paıyzy ǵana júginedi. Quqyqty sot tártibimen qorǵaýǵa keler bolsaq, saýalnamaǵa qatysqandardyń 48 paıyzy sot tóreligine senbeıdi. Bul rette respondentterdiń 16 paıyzy taýardyń quny joǵary bolǵan jaǵdaıda ǵana sotta óz quqyqtaryn qorǵaýǵa daıyn», - deıdi ol.
Osyǵan baılanysty vıtse-mınıstr tutynýshylardyń quqyǵyn qorǵaýdaǵy negizgi problemalar atady.
«Qoldanystaǵy júıe kóbine ákimshilik sharalarǵa baǵyttalǵan. Al buzylǵan quqyqtardy qalpyna keltirýge nemquraıly qaraıdy. Ekinshiden, sotqa deıingi retteý ınstıtýty jalpy qorǵanys júıesine az ıntegratsııalanǵa. Úshinshiden, memlekettik organdar men úkimettik emes uıymdardyń óz róli men mindetterin ártúrli uǵynady. Sonymen qatar, tutynýshylyq saýattylyqtyń tómendiligi, olardyń quqyqtaryn qorǵaýdyń qarapaıym jáne naqty algorıtminiń bolmaýy, tutynýshylardyń qarapaıym quqyqtaryn buzǵany úshin kásipkerlerdiń jazalanbaýy ózekti problema bolyp otyr», - dedi ol.
