Tutynýshylar quqyn qorǵaýǵa arnalǵan joba boıynsha kelisim komıssııasynyń quramyna senatorlar saılandy
ASTANA. Aqpannyń 25-i. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda «Tutynýshylardyń quqyqtaryn qorǵaý týraly» zań jobasy boıynsha qos palata arasynda kelispeýshilikterdi eńserý jónindegi kelisim komıssııasyn qurý týraly másele talqylanyp, komıssııa quramyna senatorlar saılandy,
dep habarlaıdy QazAqparat.
Qazirgi kúni qoldanystaǵy tutynýshylar quqyqtaryn qorǵaý salasyndaǵy qatynastardy retteıtin zańnamalyq akti 1991 jylǵy qańtardyń 5-inde qabyldanǵan «Tutynýshylardyń pravolaryn qorǵaý týraly» Qazaq KSR zańy bolyp tabylady. Osyǵan baılanysty atalǵan zań jobasy jańa redaktsııada jasalyp otyr. Qujattyń maqsaty osy saladaǵy zańnamany el ekonomıkasynyń qazirgi talaptaryna jáne qoldanystaǵy basqa da zańnamalarǵa sáıkes keltirý bolyp tabylady. Sonymen birge, tutynýshylardyń qorǵaý júıesiniń naqty tetigi búgingi kúnge deıin qalyptaspaǵandyqtan, olardyń quqyqtaryn qorǵaý problemasy ózekti másele bolyp tabylady.
Parlament Senaty Májilis maquldaǵan zań jobasyna birqatar túzetýler engizgen bolatyn. Atap aıtqanda, joǵary palata depýtattary «tutynýshy» uǵymyn naqtylap, tutynýshylardyń quqyǵyn kózdeıtin normalardy tolyqtyra túsken. Jalpy senatorlar qujatqa qatysty 40 túzetýdi usynǵan. Májilis depýtattary bulardyń basym bóligimen kelispeıtindikterin bildirgendikten, kelisim komıssııasy qurylyp otyr. Onyń quramyna Senat tarapynan depýtat Mıhaıl Bortnık, Sársenbaı Eńsegenov jáne Nurlyǵaıym Joldasbaevalar saılandy.
