Tutynýshylar quqyn qorǵaýda qoǵamdyq uıymdardyń rólin arttyrý mańyzdy - TMRA
ASTANA. 18 naýryz. QazAqparat - Tutynýshylar quqyn qorǵaýda qoǵamdyq uıymdardyń rólin arttyrý jáne memlekettik qoldaýdy kúsheıtý mańyzdy. Búgin Parlament Májilisindegi Úkimet saǵatynda QR Tabıǵı monopolııalardy retteý agenttiginiń tóraǵasy Murat Ospanov osylaı málim etti.
Tóraǵanyń aıtýynsha, búgingi tańda birqatar memlekettik organdar tutynýshylar quqyn qorǵaý aıasyndaǵy zańnamanyń saqtalýyn baqylaıdy. Nátıjesinde tutynýshylar aryzyna den qoıý sharalaryn jetildirý qajettigi týyndaǵan. «Sebebi kóptegen jaǵdaılarda ákimshilik resýrstar qoldanylyp júr. Máselen, biz ótken jyly kelip túsken ótinishterge taldaý júrgizgen edik. Soǵan sáıkes, onyń jalpy sanynyń 7 paıyzyn aryzdar qurasa, onyń 40 paıyzǵa jýyǵy memlekettik organdardyń qyzmetine qatysty bolyp otyr. Jalpy, barlyq memlekettik baqylaý organdary ózara tıimdi is-qımyl jasaǵanda ǵana tutynýshylardyń quqyǵyn naqty qorǵaýǵa bolady», - deıdi M. Ospanov. Onyń aıtýynsha, tutynýshylar quqynyń qorǵalýyna qatysty jumystardy jarııalaý sharalary da oıdaǵydaı nátıje bermeı otyr.
Óıtkeni, tutynýshylar da buqaralyq aqparat quraldary da bundaı sharalarǵa qyzyǵýshylyq tanytpaǵan. «Atalǵan faktorlardyń barlyǵy bizdiń jumysymyzdy kúsheıtýdi jáne qoǵamdyq uıymdarmen jumysty jandandyrýdy talap etedi. Osyǵan baılanysty tutynýshylar quqyq qorǵaý kezinde qoǵamdyq uıymdardyń rólin arttyrý jáne memlekettik qoldaýdy arttyrý qajet dep bilemiz», - deıdi M. Ospanov.
