Tutynýshylar quqyǵyn qorǵaıtyn Ombýdsmen ınstıtýty engiziledi

NUR-SULTAN. QazAqparat – Tutynýshylardyń quqyǵyn qorǵaıtyn Ombýdsmen ınstıtýtyn engizý josparlanyp otyr. Bul týraly Saýda jáne ıntegratsııa mınıstrliginiń Tutynýshylar quqyqtaryn qorǵaý komıtetiniń baspasóz qyzmeti málimdedi, dep habarlaıdy QazAqparat tilshisi.

Vedomstvo dereginshe, tutynýshylardyń quqyǵyn qorǵaý máseleleri jónindegi Ombýdsmen ınstıtýtyn engizý týraly zań jobasy ázirlengen. Ol tutynýshylar, ǵylymı qyzmetkerler men sarapshylardyń ashyq talqylaýynan soń qabyldanady.

Jańa zańǵa sáıkes, Ombýdsmen ınstıtýty salalyq memlekettik organdar ázirleıtin quqyqtyq aktilerdi daıyndaý protsesine mindetti túrde qatysýǵa quqyly bolady. Sondaı-aq, kelisimsharttarda tutynýshylardyń quqyǵyn shekteıtin jaǵdaılarǵa jol bermeý úshin eskertý jasaýǵa quzyrly. Instıtýt elektrondyq saýda salasyndaǵy qoǵamdyq qatynastardy retteý úshin saýda nysandarymen birlese jumys atqarady.

Aıta keteıik, buǵan deıin Qyzylordada tutynýshylar quqyǵyn qorǵaýǵa baılanysty túsetin shaǵym 30,4 esege kóbeıgenin habarlap edik.